വാഷിംങ്ടൺ: അമേരിക്കയിൽ സർക്കാരിൻ്റെ അടച്ചുപൂട്ടൽ (ഷട്ട്ഡൗൺ ) നിലവിൽ വന്നു. അത്യാവശ്യ സേവനങ്ങൾ ഒഴികെയുള്ള സർക്കാർ സേവനങ്ങൾ എല്ലാം നിർത്തിവെക്കുന്ന സവിശേഷ സാഹചര്യമാണ് അടച്ചുപൂട്ടൽ. യുഎസിൽ സാമ്പത്തിക വർഷം ആരംഭിക്കുന്ന ഒക്ടോബർ 1ന് മുൻപ് ഫണ്ട് അനുവദിക്കാൻ കോൺഗ്രസിനു കഴിയാതെ വന്നതോടെയാണ് അടച്ചുപൂട്ടൽ നിലവിൽ വന്നത്. അടച്ചുപൂട്ടൽ ഒഴിവാക്കാനായി പ്രതിപക്ഷവുമായി പ്രസിഡന്റ് ഡോണൾഡ് ട്രംപ് നടത്തിയ ചർച്ച വിജയം കണ്ടിരുന്നില്ല. യുഎസ് കോൺഗ്രസിൽ ഫെഡറൽ സർക്കാരിന്റെ പ്രവർത്തനങ്ങൾക്ക് ആവശ്യമായ വാർഷിക ഫണ്ടിങ് ബില്ലുകൾ പാസാകാത്ത സാഹചര്യത്തിലാണ് അടച്ചുപൂട്ടൽ നടപ്പാക്കുന്നത്.
നാസയുടെ ബഹിരാകാശ ദൗത്യങ്ങൾ, പ്രസിഡന്റ് ഡൊണാൾഡ് ട്രംപിന്റെ കുടിയേറ്റ നിയന്ത്രണങ്ങൾ, ഫുഡ് ആൻഡ് ഡ്രഗ് അഡ്മിനിസ്ട്രേഷൻ, യുണൈറ്റഡ് സ്റ്റേറ്റ്സ് ഡിപ്പാർട്ട്മെന്റ് ഓഫ് അഗ്രികൾച്ചർ എന്നിവയിലെ ചില പൊതുജനാരോഗ്യ പ്രവർത്തനങ്ങൾ എന്നിവ പോലുള്ള സർക്കാർ പ്രവർത്തനങ്ങളും അടച്ചുപൂട്ടൽ സമയത്ത് തുടരും. ആശുപത്രിയിലെ മെഡിക്കൽ പരിചരണം, അതിർത്തി സംരക്ഷണം, നിയമ നിർവ്വഹണം, വ്യോമഗതാഗത നിയന്ത്രണം എന്നിവയും അടച്ചുപൂട്ടൽ സമയത്ത് പ്രവർത്തിക്കും.
അതേസമയം, സാമൂഹിക സുരക്ഷ, മെഡികെയർ ചെക്കുകൾ തുടങ്ങിയവയുടെ ആനുകൂല്യ പരിശോധനയും കാർഡ് വിതരണവും നിർത്തിയേക്കാം. സൈനിക ഉദ്യോഗസ്ഥർ ഉൾപ്പെടെയുള്ള അവശ്യ ജീവനക്കാർ ശമ്പളമില്ലാതെ ജോലി ചെയ്യേണ്ടി വരും. അത്യാവശ്യമല്ലാത്ത ഫെഡറൽ ജീവനക്കാരെ അവധിയിൽ അയയ്ക്കും. കോൺഗ്രസ് ബജറ്റ് ഓഫീസിന്റെ കണക്കനുസരിച്ച്, ട്രംപ് സ്ഥിരമായ പിരിച്ചുവിടലുകളുമായി മുന്നോട്ടുപോയില്ലെങ്കിലും, 750,000 ഫെഡറൽ ജീവനക്കാരെ താൽക്കാലികമായി പിരിച്ചുവിടാൻ സാധ്യതയുണ്ടെന്നാണ് റിപ്പോർട്ടുകൾ.
കൂടാതെ ഭക്ഷ്യ സഹായ പരിപാടി, വിദ്യാർത്ഥി വായ്പകൾ നൽകൽ, ഭക്ഷ്യ പരിശോധനകൾ, ദേശീയ പാർക്കുകളിലെ പ്രവർത്തനങ്ങൾ തുടങ്ങിയോ വെട്ടിക്കുറയ്ക്കുകയോ അടച്ചുപൂട്ടാനോ സാധ്യതയുണ്ടെന്നും റിപ്പോർട്ടുകൾ പറയുന്നു. ഏകദേശം ഏഴ് വർഷങ്ങൾക്ക് ശേഷമാണ് അമേരിക്കയിൽ അടച്ചുപൂട്ടൽ നിലവിൽ വരുന്നത്. 2018-19ൽ 35 ദിവസം ഇത്തരത്തിൽ ഷട്ട്ഡൗൺ നടപ്പാക്കിയിരുന്നു. 1981 ന് ശേഷമുള്ള 15-ാം ഷട്ട്ഡൗണിലേക്കാണു യുഎസ് നീങ്ങിയിരിക്കുന്നത്.
