അമേരിക്കയിൽ അടച്ചുപൂട്ടൽ തുടരവേ വിമാന ഗതാഗതത്തിലെ തടസങ്ങളും ജീവനക്കാരുടെ ക്ഷാമവും പരിഹരിക്കാനായി അമേരിക്കൻ ഫെഡറൽ എവിയേഷൻ അഡ്മിനിസ്ട്രേഷൻ (FAA) രാജ്യത്തെ തിരക്കേറിയ വിമാനത്താവളങ്ങളിൽ വിമാനങ്ങളുടെ എണ്ണം കുറയ്ക്കുമെന്ന് ഗതാഗത സെക്രട്ടറി ഷോൺ ഡഫി പറഞ്ഞു.
അടുത്ത വെള്ളിയാഴ്ച മുതൽ 40 വിമാനത്താവളങ്ങളിൽ 10% വരെ വിമാന സർവ്വീസ് കുറയ്ക്കുമെന്ന് FAA അഡ്മിനിസ്ട്രേറ്റർ ബ്രയാൻ ബെഡ്ഫോർഡ് പറഞ്ഞു. ഈ തീരുമാനം എയർ ട്രാഫിക് കൺട്രോളർമാരുടെ ക്ഷീണം കാരണം എടുക്കുന്നതാണെന്നും അദ്ദേഹം വ്യക്തമാക്കി.
ആദ്യഘട്ടത്തിൽ വെള്ളിയാഴ്ച നാല് ശതമാനവും, ശനിയാഴ്ച അഞ്ച് ശതമാനവുമാണ് കുറക്കുന്നത്. പിന്നെ അടുത്ത ആഴ്ച 10 ശതമാനം വരെയും കുറയ്ക്കും. ഏതൊക്കെ വിമാനത്താവളങ്ങളെയാണ് ബാധിക്കുക എന്ന പട്ടിക വ്യാഴാഴ്ച പ്രസിദ്ധീകരിക്കും.
അമേരിക്കൻ സർക്കാർ അടച്ചുപൂട്ടൽ രണ്ടാം മാസത്തിലേക്ക് കടക്കുമ്പോൾ, ശമ്പളം ലഭിക്കാതെ ജോലി ചെയ്യുന്ന എയർ ട്രാഫിക് കൺട്രോളർമാരുടെ കുറവ് മൂലം 2,000 മുതൽ 3,000 വരെ ജീവനക്കാരുടെ ക്ഷാമം നേരിടുകയാണെന്നും ചില കൺട്രോളർമാർ കുടുംബച്ചെലവുകൾ നിറവേറ്റാൻ പാർട്ട്-ടൈം ജോലികൾ ചെയ്യുകയാണെന്നും ഷോൺ ഡഫി പറഞ്ഞു.
കഴിഞ്ഞ ദിവസങ്ങളിൽ ചിക്കാഗോ, ന്യൂയോർക്ക്, അറ്റ്ലാന്റ തുടങ്ങിയ പ്രധാന വിമാനത്താവളങ്ങളിൽ ആയിരക്കണക്കിന് വിമാനങ്ങൾ വൈകുകയും നിരവധി സർവ്വീസുകൾ റദ്ദാക്കുകയും ചെയ്തിരുന്നു.
പുതിയ മാറ്റം പ്രാദേശിക, ആഭ്യന്തര സർവീസുകളെ പ്രധാനമായും ബാധിക്കുമെങ്കിലും അന്തർദേശീയ സർവീസുകൾക്ക് വലിയ മാറ്റമുണ്ടാകില്ല എന്ന് യുണൈറ്റഡ് എയർലൈൻസ്, അമേരിക്കൻ എയർലൈൻസ് തുടങ്ങി പ്രധാന കമ്പനികൾ പറഞ്ഞു. യാത്രക്കാർക്ക് അവരുടെ ഫ്ലൈറ്റ് റദ്ദായാൽ റീഫണ്ട് പൂർണമായും ലഭിക്കുമെന്നും എയർലൈൻ കമ്പനികൾ അറിയിച്ചു.
US shutdown; Airline services cut due to staff shortage – American Federal Aviation Administration
