ഗൊണ്ട (ഉത്തർപ്രദേശ്): ബൈക്കിൽ സഞ്ചരിച്ച പ്രണയജോഡികളായ യുവാവിനെയും പെൺകുട്ടിയെയും ഗ്രാമവാസികളും ബന്ധുക്കളും ചേർന്ന് പിടികൂടി നിർബന്ധിതമായി വിവാഹം കഴിപ്പിച്ചു. ഗൊണ്ട ജില്ലയിലെ രാം ജനകി ക്ഷേത്രത്തിൽ കൊണ്ടു പോയി വിവാഹം നടത്തിക്കൊടുത്തു. വിവാഹ ചടങ്ങ് കാണാൻ വലിയൊരു ജനാവലിയുണ്ടായിരുന്നു. വിവാഹത്തിന്റെ ദൃശ്യങ്ങൾ സമൂഹമാധ്യമങ്ങളിൽ വൈറലായി.
സെപ്റ്റംബർ 27 നായിരുന്നു സംഭവം. ബൈക്കിൽ സഞ്ചരിക്കുന്നതിനിടയിലാണ് സോനു മൗര്യ (20), നിഷ മൗര്യ (19) എന്നിവരെ ഗ്രാമവാസികൾ ഇവരെ പിടികൂടിയത്. തുടർന്ന് അവരുടെ മാതാപിതാക്കളെയും വിളിച്ചു കൂട്ടി, ഇരുവരെയും അടുത്തുള്ള ക്ഷേത്രത്തിലേക്ക് കൂട്ടിക്കൊണ്ടുപോയി വിവാഹം നടത്തിക്കൊടുക്കുകയും ചെയ്തു.
ഗ്രാമത്തിലെ മാർക്കറ്റിൽ വെച്ചാണ് ഇരുവരും പരിചയപ്പെട്ടവരാണ്. യുവാവ് അവിടെ ഒരു ചായക്കട നടത്തുകയാണ്. കുടുംബത്തേയും ഗ്രാമവാസികളെയും അറിയാതെ ഇരുവരും ഇടയ്ക്ക് കാണാറുണ്ടായിരുന്നു. ഇത്തവണ വീട്ടുകാർ അറിയാതെ കണ്ടപ്പോഴാണ് നാട്ടുകാർ വിവാഹം കഴിപ്പിച്ചത്. സമൂഹമാധ്യമങ്ങളിലെ വൈറൽ കല്യാണ വീഡിയോയിൽ പ്രണയജോടി ക്ഷേത്രത്തിന് പുറത്ത് നിന്നുകൊണ്ട് പരസ്പരം പുഷ്പമാലകൾ അണിയ്ക്കുന്നതും സോനു സ്വന്തം കാമുകിയുടെ നെറ്റിയിൽ കുങ്കുമം ചാർത്തുന്നതും കാണാം.
