ലണ്ടന്‍: അന്താരാഷ്ട്ര യോഗാ ദിനം അവിസ്മരണീയമാക്കി യുകെയും. ലണ്ടനിലെ ഇന്ത്യന്‍ ഹൈക്കമ്മീഷന്‍ സംഘടിപ്പിച്ച അന്താരാഷ്ട്ര യോഗ ദിനത്തോടനുബന്ധിച്ച് വിവിധ യോഗാ പരിപാടികള്‍ സംഘടിപ്പിച്ചു. വിദഗ്ധര്‍ നയിച്ച യോഗാപരിപാടിയില്‍ പങ്കെടുക്കാന്‍ നൂറുകണക്കിന് ആളുകളാണ് ലണ്ടനിലെ സ്ട്രാന്‍ഡിലുള്ള ഒരു ഐക്കണിക് സ്‌ക്വയറില്‍ ഒത്തുകൂടിയത്.
യുകെയിലെ ഇന്ത്യന്‍ ഹൈക്കമ്മീഷണര്‍ വിക്രം ദൊരൈസ്വാമി യോഗ ദിനത്തിന്റെ പതിനൊന്നാം വാര്‍ഷികം ആഘോഷിക്കുന്ന ചടങ്ങുകള്‍ ഉദ്ഘാടനം ചെയ്തു. ചാള്‍സ് മൂന്നാമന്‍ രാജാവിന്റെ പ്രത്യേക സന്ദേശം വായിച്ചുകൊണ്ടാണ് അദ്ദേഹം പരിപാടിക്ക് തുടക്കം കുറിച്ചത്. യോഗയോടുള്ള തന്റെ അടുപ്പത്തിന് പേരുകേട്ട 76 കാരനായ രാജാവ്, ഈ വാര്‍ഷിക ആഘോഷം ‘ഐക്യം, കാരുണ്യം, ക്ഷേമം എന്നിവയുടെ ആഗോള തത്വങ്ങളെ പ്രോത്സാഹിപ്പിക്കുന്നു’ എന്ന് വ്യക്തമാക്കി. ‘യോഗ, ഭൂമിക്കും ആരോഗ്യത്തിനും എന്ന ഈ വര്‍ഷത്തെ പ്രമേയം, വര്‍ത്തമാന, ഭാവി തലമുറകള്‍ക്ക് സന്തോഷകരവും ആരോഗ്യകരവുമായ ഒരു ഭാവി ഉറപ്പാക്കാന്‍ ലോകം ഒത്തുചേരേണ്ടതിന്റെ പ്രാധാന്യമാണ് നമ്മെ ഓര്‍മ്മിപ്പിക്കുന്നതെന്ന് ബക്കിംഗ്ഹാം കൊട്ടാരത്തില്‍ നിന്നുള്ള രാജാവിന്റെ സന്ദേശത്തലുണ്ടായിരുന്നു. ‘അന്താരാഷ്ട്ര യോഗ ദിനം പോലുള്ള സംരംഭങ്ങള്‍ വളരെയധികം ആളുകള്‍ക്ക് വളരെയധികം അര്‍ത്ഥവത്തായ ഒരു പരിശീലനവും തത്ത്വചിന്തയും ആഘോഷിക്കാനുള്ള അവസരം നല്‍കുന്നു. വര്‍ഷം തോറും, യുകെയിലുടനീളം യോഗയുടെ ജനപ്രീതി വര്‍ദ്ധിച്ചുകൊണ്ടിരിക്കുകയാണ്, നമ്മുടെ രാജ്യത്തെ ദശലക്ഷക്കണക്കിന് ആളുകള്‍ അതിന്റെ നേട്ടങ്ങള്‍ കൊയ്യുന്നു. ഏതൊരു വ്യക്തിയുടെയും ശാരീരികവും മാനസികവുമായ ആരോഗ്യം മെച്ചപ്പെടുത്താന്‍ പ്രാപ്തമാക്കുന്നതിനുള്ള ശക്തമായ മാര്‍ഗമാണ് യോഗ, കൂടാതെ സമൂഹങ്ങള്‍ക്കുള്ളില്‍ ക്ഷേമത്തിന്റെയും ഐക്യത്തിന്റെയും ഒരു ബോധം വളര്‍ത്തുകയും ചെയ്യുന്നു,’ ചാള്‍സ് മൂന്നാമന്‍ രാജാവിന്റെ പ്രത്യേക സന്ദേശത്തില്‍ പറഞ്ഞു.
പ്രധാനമന്ത്രി നരേന്ദ്ര മോദി 2014 ല്‍ മുന്നോട്ടുവച്ച ഒരു പ്രമേയം ഐക്യരാഷ്ട്രസഭ അംഗീകരിച്ചിട്ട് ഒരു പതിറ്റാണ്ടിലേറെയായെന്നും എല്ലാ പങ്കാളി രാജ്യങ്ങളുടെയും പിന്തുണയോടെ വളരെ ജനപ്രിയമായ ഒരു സംരംഭമായി അത് മുന്നോട്ടുപോകുന്നുവെന്നും ദൊരൈസ്വാമി ഓര്‍മ്മിപ്പിച്ചു.
