കണ്ണൂർ: മൈക്രോ ക്യാമറയും ഇയർഫോണുമായി പിഎസ്‌സി പരീക്ഷയിൽ കോപ്പിയടി നടത്തിയ യുവാവ് പിടിയിൽ. കണ്ണൂർ പയ്യാമ്പലം ഗവൺമെന്റ് ഗേൾസ് ഹയർസെക്കൻഡറി സ്‌കൂളിലായിരുന്നു സംഭവം. കോപ്പിയടിച്ച പെരളശേരി സ്വദേശി മുഹമ്മദ് സഹദിനെ പിഎസ് സി വിജിലൻസ് വിഭാഗം പിടികൂടി. പരീക്ഷയ്ക്കിടെയാണ് യുവാവിനെ വിജിലൻസ് വിഭാഗം പിടികൂടിയത്.
സെക്രട്ടറിയേറ്റ് ഓഫീസ് അസിസ്റ്റൻറ് പരീക്ഷക്കിടെയായിരുന്നു കോപ്പിയടിച്ചത്. നേരത്തെ തന്നെ പിഎസ്‌സി വിജിലൻസ് വിഭാഗത്തിന് സംശയങ്ങൾ ഉയർന്നതിനെ തുടർന്നാണ് ഇന്ന് പരീക്ഷയ്ക്കിടെ പരിശോധന നടത്തിയത്. ഷർട്ടിന്റെ കോളറിൽ മൈക്രോ ക്യാമറ ഘടിപ്പിച്ചുകൊണ്ട് ചോദ്യ പേപ്പറിന്റെ ദൃശ്യങ്ങൾ പകർത്തുകയും ഉത്തരങ്ങൾ ബ്ലൂടൂത്ത് ഇയർഫോണിലൂടെ ലഭിക്കുകയും ചെയ്തിരുന്നു. പരിശോധനയിൽ പിഎസ് സി വിജിലൻസ് വിഭാഗം ഇത് കണ്ടെത്തുകയായിരുന്നു. ശേഷം ഇയാൾ ഓടി രക്ഷപ്പെടാൻ ശ്രമം നടത്തിയെങ്കിലും കണ്ണൂർ ടൗൺ പൊലീസ് പിടികൂടി.
