വാഷിംഗ്ടൺ: അമേരിക്കൻ എയർലൈൻസിൻ്റെ 100 വർഷത്തെ ചരിത്രത്തിലെ ഏറ്റവും വലിയ തടസ്സങ്ങളിൽ ഒന്നായ ‘ഫേൺ’ ശീതക്കാറ്റിനെത്തുടർന്ന് നിർത്തിവെച്ച വിമാന സർവീസുകൾ സാധാരണ നിലയിലാക്കാനുള്ള ശ്രമങ്ങൾ പുരോഗമിക്കുന്നു.
കഴിഞ്ഞ ശനിയാഴ്ച മുതൽ ഏകദേശം 9,000-ത്തിലധികം വിമാനങ്ങൾ കമ്പനി റദ്ദാക്കി. ഏറ്റവും കൂടുതൽ ബാധിച്ച ഞായറാഴ്ച മാത്രം ഷെഡ്യൂൾ ചെയ്തതിന്റെ 37% വിമാനങ്ങളും റദ്ദാക്കേണ്ടി വന്നു. അമേരിക്കൻ എയർലൈൻസിൻ്റെ പ്രധാന ഹബ്ബായ ഡാളസ്-ഫോർട്ട് വർത്ത് വിമാനത്താവളത്തിൽ കനത്ത മഞ്ഞും ഐസും അടിഞ്ഞുകൂടിയതാണ് പ്രതിസന്ധി രൂക്ഷമാക്കിയത്. കൂടാതെ ജീവനക്കാർക്ക് കൃത്യസമയത്ത് വിമാനത്താവളങ്ങളിൽ എത്താൻ കഴിയാത്തതും തിരിച്ചടിയായി.
സർവീസുകൾ വേഗത്തിലാക്കാൻ പൈലറ്റുമാർക്കും ക്രൂ അംഗങ്ങൾക്കും കമ്പനി പ്രത്യേക ആനുകൂല്യങ്ങളും അധിക വേതനവും വാഗ്ദാനം ചെയ്തിട്ടുണ്ട്. ബുധനാഴ്ചയോടെ പ്രവർത്തനങ്ങൾ മെച്ചപ്പെട്ടു തുടങ്ങിയതായും വ്യാഴാഴ്ചയോടെ സർവീസുകൾ പൂർണ്ണമായി സാധാരണ നിലയിലാകുമെന്നും എയർലൈൻ അധികൃതർ അറിയിച്ചു.
ടിക്കറ്റ് ബുക്ക് ചെയ്തവർ വിമാനത്തിൻ്റെ നിലവിലെ സ്ഥിതി അറിയാൻ American Airlines ആപ്പ് പരിശോധിക്കണമെന്ന് കമ്പനി അറിയിച്ചു. ജനുവരി 30 വരെയുള്ള യാത്രകൾക്ക് അധിക തുക നൽകാതെ ടിക്കറ്റ് മാറ്റാനുള്ള സൗകര്യവും എയർലൈൻ നൽകുന്നുണ്ട്.
കനത്ത മഞ്ഞ് വീഴ്ച കാരണം യുണൈറ്റഡ്, ഡെൽറ്റ തുടങ്ങിയ മറ്റ് വിമാനക്കമ്പനികളെക്കാൾ കൂടുതൽ ആഘാതം അമേരിക്കൻ എയർലൈൻസിനാണ് ഉണ്ടായത്.
American Airlines struggling to return to normal service amid cold snap.
