വാഷിങ്ടൺ: ഇറാനുമായുള്ള യുദ്ധത്തിൽനിന്ന് അമേരിക്ക എത്രയും പെട്ടെന്ന് പിന്മാറണമെന്ന് അമേരിക്കക്കാരിൽ ഭൂരിഭാഗം പേരും കരുതുന്നതായി റോയിട്ടേഴ്സ്/ഇപ്സോസ് അഭിപ്രായസർവേ. ലക്ഷ്യങ്ങൾ പൂർണ്ണമായി നേടിയെടുത്തില്ലെങ്കിലും യുദ്ധം പെട്ടെന്ന് അവസാനിപ്പിക്കണമെന്നാണ് അമേരിക്കക്കാരുടെ അഭിപ്രായം രേഖപ്പെടുത്തിയിരിക്കുന്നത്. യുദ്ധം ഇന്ധനവില വർദ്ധനവ്, സാമ്പത്തിക സമ്മർദ്ദം എന്നിവയെ കുറിച്ചുള്ള പൊതുജനങ്ങളുടെ ആശങ്ക വർദ്ധിക്കുന്നതിനാലാണ് ഇത്തരമൊരു അഭിപ്രായം ഭൂരിഭാഗം ജനങ്ങളിലും ഉടലെടുക്കാൻ കാരണമെന്നാണ് വിലയിരുത്തൽ.
സർവേയിൽ പ്രതികരിച്ച 66 ശതമാനം പേരും യുഎസ് എത്രയും പെട്ടെന്ന് സംഘർഷം അവസാനിപ്പിക്കണമെന്ന് അഭിപ്രായപ്പെട്ടു. സംഘർഷം ദീർഘകാലം തുടർന്നാലും ലക്ഷ്യങ്ങളെല്ലാം നേടുന്നത് വരെ സൈനിക ഇടപെടൽ തുടരണമെന്നാണ് 27 ശതമാനം പേർ അഭിപ്രായപെട്ടത്. ആറ് ശതമാനം പേർ പ്രതികരിച്ചില്ല. ട്രംപിൻ്റെ റിപ്പബ്ലിക്കൻ അടിത്തറയിൽ അഭിപ്രായഭിന്നതയുണ്ടെന്ന് സർവേ സൂചിപ്പിക്കുന്നു. സർവേയിൽ റിപ്പബ്ലിക്കൻ അനുകൂലികളിൽ 57 ശതമാനം പേർ യുഎസ് ലക്ഷ്യങ്ങൾ നേടിയെടുക്കുന്നത് വരെ സംഘർഷം തുടരുന്നതിനെ പിന്തുണച്ചപ്പോൾ, 40 ശതമാനം പേർ യുഎസ് എല്ലാ ഫലങ്ങളും നേടാതെ തന്നെ യുദ്ധം അവസാനിപ്പിക്കാൻ ശ്രമിക്കണം എന്ന് അഭിപ്രായപ്പെട്ടുവെന്നാണ് റോയിട്ടേഴ്സ് റിപ്പോർട്ട് ചെയ്യുന്നത്.
സർവേ പ്രകാരം, പ്രതികരിച്ചവരിൽ 60 ശതമാനം പേർ ഇറാനിൽ യുഎസ് സൈനിക ആക്രമണത്തെ അംഗീകരിച്ചില്ല, അതേസമയം 35 ശതമാനം പേർ അംഗീകരിച്ചു. വെള്ളിയാഴ്ച മുതൽ ഞായർ വരെ 1,021 പ്രതികരിച്ചവരിൽ നിന്നാണ് ഈ അഭിപ്രായസർവേ നടത്തിയത്. അഭിപ്രായസർവേയിൽ പങ്കെടുത്ത മൂന്നിൽ രണ്ടുഭാഗവും അടുത്ത വർഷം ഗ്യാസ് വില കൂടുതൽ വഷളാവുമെന്ന് കരുതുന്നവരാണ്. പ്രതികരിച്ചവരിൽ പകുതിയിൽ കൂടുതൽ പേരും സംഘർഷം അവരുടെ വ്യക്തിഗത സാമ്പത്തിക സാഹചര്യങ്ങളെ ദോഷകരമായി ബാധിക്കുമെന്ന് കരുതുന്നു. യുദ്ധത്തിൻ്റെ ഏറ്റവും പെട്ടെന്നുള്ള ഫലങ്ങളിൽ അമേരിക്കക്കാർ നേരിടുന്ന ഒന്നാണ് ഗ്യാസോലിൻ വില വർദ്ധനവ്.
വില ട്രാക്ക് ചെയ്യുന്ന ഗ്യാസ് ബഡ്ഡിയിൽ നിന്നുള്ള ഡാറ്റ അനുസരിച്ച്, ഗ്യാസ് വില മൂന്നു വർഷത്തിനിടയിൽ ആദ്യമായി ഒരു ഗാലണിന് 4 ഡോളർ കവിഞ്ഞു. അസോസിയേറ്റഡ് പ്രസ് റിപ്പോർട്ട് ചെയ്തതനുസരിച്ച്, സാധാരണ ഗ്യാസോലിന്റെ ദേശീയ ശരാശരി വില ഒരു ഗാലണിന് 4.02 ഡോളർ ആയി ഉയർന്നു, ഇത് ഫെബ്രുവരി 28 ന് സംഘർഷം ആരംഭിക്കുന്നതിന് മുമ്പുള്ളതിനേക്കാൾ ഒരു ഡോളറിലധികം കൂടുതലാണ്. യുദ്ധം ആരംഭിക്കുന്നതിന് മുമ്പ് ഏകദേശം 70 ഡോളറായിരുന്ന ബെഞ്ച്മാർക്ക് ക്രൂഡ് 100 ഡോളറിന് മുകളിലേക്ക് ഉയർന്നു. ഗതാഗത, ലോജിസ്റ്റിക്സ് ചെലവുകൾ വർദ്ധിക്കുന്നതിനാൽ, ഉയർന്ന ഇന്ധനച്ചെലവ് പലചരക്ക് സാധനങ്ങളും ഷിപ്പിങ്ങും ഉൾപ്പെടെയുള്ള കൂടുതൽ ഗാർഹിക ചെലവുകളെ ബാധിക്കുമെന്നാണ് നിരീക്ഷകരുടെ വിലയിരുത്തൽ.
Americans against war; Fuel prices rise, Reuters poll says war should be ended as soon as possible
