തിരുവനന്തപുരം കോർപ്പറേഷൻ ഭരണമുൾപ്പെടെ തദ്ദേശ തെരഞ്ഞെടുപ്പിൽ ബിജെപി നേടിയ ചരിത്ര വിജയത്തിന് പിന്നാലെ, കേരളത്തിൽ ബിജെപി മുഖ്യമന്ത്രി അധികാരത്തിൽ വരുമെന്ന ഉറച്ച പ്രഖ്യാപനവുമായി കേന്ദ്ര ആഭ്യന്തരമന്ത്രി അമിത് ഷാ. ഇന്ന് തലസ്ഥാന നഗരിയിൽ ബിജെപി മേയർ ഉണ്ടെങ്കിൽ, 2026-ഓടെ കേരളത്തിൽ ബിജെപി മുഖ്യമന്ത്രിയുണ്ടാകുമെന്ന് അദ്ദേഹം പറഞ്ഞു. തദ്ദേശ തെരഞ്ഞെടുപ്പിൽ വിജയിച്ച ജനപ്രതിനിധികളെ അഭിസംബോധന ചെയ്തുകൊണ്ട് ‘മിഷൻ 2026’ എന്ന ലക്ഷ്യം അദ്ദേഹം ഔദ്യോഗികമായി അവതരിപ്പിച്ചു. വികസിത കേരളം യാഥാർത്ഥ്യമാകണമെങ്കിൽ എൽഡിഎഫിനും യുഡിഎഫിനും പുറത്തുള്ള ഒരു ബദൽ ആവശ്യമാണെന്നും അഴിമതിയുടെ കാര്യത്തിൽ ഇരു മുന്നണികളും ‘മാച്ച് ഫിക്സിംഗ്’ നടത്തുകയാണെന്നും അദ്ദേഹം ആരോപിച്ചു.
ശബരിമലയിലെ സ്വർണ്ണക്കൊള്ളയുമായി ബന്ധപ്പെട്ട വിവാദങ്ങളിൽ സംസ്ഥാന സർക്കാരിനെ അമിത് ഷാ രൂക്ഷമായി വെല്ലുവിളിച്ചു. ശബരിമല തന്ത്രി കണ്ഠരര് രാജീവര് ഉൾപ്പെടെയുള്ളവരുടെ അറസ്റ്റിലേക്ക് നയിച്ച സ്വർണ്ണക്കവർച്ചാ കേസ് സിബിഐ പോലുള്ള നിഷ്പക്ഷമായ കേന്ദ്ര ഏജൻസിക്ക് വിടാൻ മുഖ്യമന്ത്രി തയ്യാറുണ്ടോ എന്ന് അദ്ദേഹം ചോദിച്ചു. വിശ്വാസികളുടെ താൽപ്പര്യങ്ങൾ സംരക്ഷിക്കാൻ ബിജെപിക്ക് മാത്രമേ സാധിക്കൂ എന്നും വരാനിരിക്കുന്ന നിയമസഭാ തെരഞ്ഞെടുപ്പിൽ സ്വർണ്ണക്കൊള്ള വിഷയം എൽഡിഎഫിനും യുഡിഎഫിനുമെതിരെ ബിജെപിയുടെ പ്രധാന രാഷ്ട്രീയ ആയുധമാക്കുമെന്നും ഷാ വ്യക്തമാക്കി.
തിരുവനന്തപുരത്ത് നടന്ന ബിജെപി-എൻഡിഎ കോർ കമ്മിറ്റി യോഗങ്ങളിൽ പങ്കെടുത്ത അദ്ദേഹം, നിയമസഭാ തെരഞ്ഞെടുപ്പിന് മുന്നോടിയായി പാർട്ടി സംവിധാനത്തെ അടിത്തട്ടിൽ മുതൽ ശക്തിപ്പെടുത്താൻ നിർദ്ദേശിച്ചു. ബിജെപിയുടെ വോട്ട് വിഹിതം 20 ശതമാനത്തിൽ നിന്ന് 40 ശതമാനത്തിലേക്ക് ഉയർത്തുകയെന്ന ലക്ഷ്യം നേടാൻ പാർട്ടി പ്രവർത്തകർ ഒറ്റക്കെട്ടായി പ്രവർത്തിക്കണമെന്ന് ഷാ ആഹ്വാനം ചെയ്തു. ചടങ്ങിൽ ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖർ അമിത് ഷായ്ക്ക് അയ്യപ്പ വിഗ്രഹം സമ്മാനിച്ചു. പ്രധാനമന്ത്രി നരേന്ദ്ര മോദി ജനുവരി അവസാനത്തോടെ കേരളത്തിലെത്തി വികസന പദ്ധതികൾ പ്രഖ്യാപിക്കുമെന്നും അദ്ദേഹം സൂചിപ്പിച്ചു.
