ന്യൂഡൽഹി: സാങ്കേതിക കാരണങ്ങളാൽ ഡൽഹിയിൽ നിന്ന് മാഞ്ചസ്റ്ററിലേക്ക് പുറപ്പെട്ട ഇൻഡിഗോ വിമാനം 13 മണിക്കൂർ ആകാശത്ത് ചിലവഴിച്ച ശേഷം തിരികെ ഡൽഹിയിൽത്തന്നെ ലാൻഡ് ചെയ്തു. പശ്ചിമേഷ്യയിലെ യുദ്ധസാഹചര്യങ്ങൾ നിലനിൽക്കുന്നതിനാൽ ആഫ്രിക്കൻ പാതയിലൂടെ പറക്കുന്നതിനിടെയുണ്ടായ ‘കോൾ സൈൻ’ (Call Sign) ആശയക്കുഴപ്പമാണ് വിമാനം തിരിച്ചിറക്കാൻ കാരണമായത്.
സംഭവിച്ചത് എന്ത്?
നോർസ് അറ്റ്ലാന്റിക് എയർവേയ്സിൽ നിന്ന് ഇൻഡിഗോ വാടകയ്ക്കെടുത്ത (Wet-lease) ബോയിംഗ് 787 വിമാനമാണ് സർവീസ് നടത്തിയത്. പശ്ചിമേഷ്യൻ രാജ്യങ്ങളുടെ ആകാശം ഒഴിവാക്കി ആഫ്രിക്ക വഴി യൂറോപ്പിലേക്ക് പോകുന്നതിനിടെ എറിത്രിയൻ വ്യോമാതിർത്തിയിൽ പ്രവേശിക്കാൻ ശ്രമിക്കുമ്പോഴാണ് പ്രശ്നമുണ്ടായത്. ‘iFly’ എന്ന ഇൻഡിഗോയുടെ കോഡ് ഉപയോഗിച്ച് അനുമതി തേടിയത് അവിടുത്തെ എയർ ട്രാഫിക് കൺട്രോളിൽ ആശയക്കുഴപ്പമുണ്ടാക്കി. ഇതോടെ പ്രവേശന അനുമതി ലഭിക്കാത്തതിനെ തുടർന്ന് വിമാനം യു-ടേൺ എടുക്കുകയായിരുന്നു.
തിങ്കളാഴ്ച പുലർച്ചെ 1.14-ന് ഡൽഹിയിൽ നിന്ന് പുറപ്പെട്ട വിമാനം, എറിത്രിയൻ ആകാശത്ത് നിന്ന് തിരിഞ്ഞ് 13 മണിക്കൂർ യാത്രയ്ക്ക് ശേഷം ഉച്ചയ്ക്ക് 2.22-നാണ് തിരികെ ഡൽഹിയിലെത്തിയത്.
യൂറോപ്യൻ ഏജൻസിയായ EASA-യുടെ നിർദ്ദേശപ്രകാരം നോർസ് അറ്റ്ലാന്റിക് വിമാനങ്ങൾ സൗദി അറേബ്യ, ഇറാൻ തുടങ്ങിയ പശ്ചിമേഷ്യൻ രാജ്യങ്ങൾക്ക് മുകളിലൂടെ പറക്കാറില്ല. ആഫ്രിക്കൻ ഭൂഖണ്ഡം ചുറ്റിയുള്ള ഈ ദീർഘദൂര പാത വിമാനക്കമ്പനികൾക്ക് വലിയ സാമ്പത്തിക ബാധ്യതയും യാത്രാ തടസ്സങ്ങളും ഉണ്ടാക്കുന്നുണ്ട്. കഴിഞ്ഞ ദിവസം ഇൻഡിഗോയുടെ ലണ്ടൻ-മുംബൈ വിമാനവും സമാനമായ കാരണങ്ങളാൽ കെയ്റോയിലേക്ക് തിരിച്ചുവിട്ടിരുന്നു. യാത്രക്കാരുടെ സുരക്ഷയ്ക്കാണ് മുൻഗണനയെന്നും തടസ്സങ്ങൾ നീക്കി സർവീസ് പുനരാരംഭിക്കാൻ ശ്രമിക്കുകയാണെന്നും ഇൻഡിഗോ അറിയിച്ചു.
An IndiGo flight from Delhi to Manchester landed back in Delhi after spending 13 hours in the air due to technical issues.
