ഇന്ത്യയിലെ ഏറ്റവും വിലപിടിപ്പുള്ള കാർ രജിസ്ട്രേഷൻ നമ്പർ എന്ന റെക്കോർഡ് ഇനി ‘DDC 0001’ എന്ന നമ്പറിന് സ്വന്തം. ആന്ധ്രാപ്രദേശിലെ ഗുണ്ടൂർ സ്വദേശിയായ കിരൺ കൊൽപകുളയാണ് 2.08 കോടി രൂപയ്ക്ക് ഈ ഫാൻസി നമ്പർ ലേലത്തിൽ പിടിച്ചത്. പ്രമുഖ ലക്ഷ്വറി കാർ ഡീലർഷിപ്പായ ബിഗ് ബോയ് ടോയ്സ് (Big Boy Toyz) പുതുതായി ആരംഭിച്ച ലേല പ്ലാറ്റ്ഫോമിലൂടെയാണ് ഈ റെക്കോർഡ് വിൽപ്പന നടന്നത്.
വിസ്മയിപ്പിക്കുന്ന മറ്റൊരു വസ്തുത എന്തെന്നാൽ, കോടികൾ വിലയുള്ള ഈ നമ്പർ പ്ലേറ്റ് ഘടിപ്പിച്ചിരിക്കുന്നത് വെറും ആറ് ലക്ഷം രൂപ വിലയുള്ള മാരുതി സുസുക്കി ഇഗ്നിസ് (Ignis) കാറിലാണ് എന്നതാണ്. വാഹനത്തേക്കാൾ പത്തിരട്ടിയിലധികം വില നൽകി നമ്പർ പ്ലേറ്റ് സ്വന്തമാക്കിയ കിരണിന്റെ നടപടി സോഷ്യൽ മീഡിയയിൽ വലിയ ചർച്ചകൾക്ക് വഴിതുറന്നിട്ടുണ്ട്. വിന്റേജ് ഡൽഹി സീരീസിൽപ്പെട്ട ഈ നമ്പർ സ്വന്തമാക്കാൻ രാജ്യത്തിന്റെ വിവിധ ഭാഗങ്ങളിൽ നിന്നുള്ള പ്രമുഖർ ലേലത്തിൽ പങ്കെടുത്തിരുന്നു.
ഇതിനുമുമ്പ് ഹരിയാനയിൽ നിന്നുള്ള ഒരാൾ ‘HR 88 B 8888’ എന്ന നമ്പറിനായി 1.17 കോടി രൂപ വാഗ്ദാനം ചെയ്തിരുന്നെങ്കിലും പണമടയ്ക്കുന്നതിൽ പരാജയപ്പെട്ടതോടെ ആ ലേലം റദ്ദാക്കിയിരുന്നു. നിലവിൽ ‘KL 07 DG 0007’ എന്ന നമ്പറിനായി 46 ലക്ഷം രൂപ നൽകിയതായിരുന്നു ഇന്ത്യയിലെ മുൻപത്തെ ഉയർന്ന തുക. പുതിയ ലേലത്തിലൂടെ ലക്ഷ്വറി ശേഖരണങ്ങളോടുള്ള (Luxury collectibles) ഇന്ത്യക്കാരുടെ വർദ്ധിച്ചുവരുന്ന താൽപ്പര്യമാണ് വെളിവാകുന്നത്.
