വാഷിംഗ്ടൺ: ബഹിരാകാശ പര്യവേഷണ ചരിത്രത്തിൽ പുതിയ നാഴികക്കല്ല് കുറിച്ച് നാസയുടെ ആർട്ടിമിസ് 2 (Artemis II) ദൗത്യം. ഭൂമിയിൽ നിന്ന് ഏറ്റവും കൂടുതൽ ദൂരം സഞ്ചരിച്ച മനുഷ്യർ എന്ന അരനൂറ്റാണ്ട് പഴക്കമുള്ള റെക്കോർഡ് ആർട്ടിമിസ് 2-ലെ നാലംഗ സംഘം മറികടന്നു. 1970-ൽ അപ്പോളോ 13 ദൗത്യം സ്ഥാപിച്ച റെക്കോർഡാണ് 56 വർഷങ്ങൾക്ക് ശേഷം തിരുത്തപ്പെട്ടത്.
ഭൂമിയിൽ നിന്ന് ഏകദേശം 4,06,788 കിലോമീറ്റർ (2,52,760 മൈൽ) ദൂരം പിന്നിട്ടാണ് ആർട്ടിമിസ് സംഘം ചരിത്രം കുറിച്ചത്. അപ്പോളോ 13 ദൗത്യം സഞ്ചരിച്ച 4,00,171 കിലോമീറ്റർ എന്ന പരിധിയാണ് ഇതോടെ പഴങ്കഥയായത്. ചന്ദ്രൻ്റെ മറുപുറത്തുകൂടി (Far side of the Moon) സഞ്ചരിക്കവെയാണ് സംഘം ഈ നേട്ടം കൈവരിച്ചത്.
നാസയുടെ റീഡ് വൈസ്മാൻ (കമാൻഡർ), വിക്ടർ ഗ്ലോവർ (പൈലറ്റ്), ക്രിസ്റ്റീന കോച്ച് (മിഷൻ സ്പെഷ്യലിസ്റ്റ്), കനേഡിയൻ ബഹിരാകാശ ഏജൻസിയുടെ ജെറമി ഹാൻസൻ എന്നിവരാണ് ഈ ചരിത്ര ദൗത്യത്തിലുള്ളത്. ചന്ദ്രൻ്റെ ഭ്രമണപഥത്തിലേക്ക് എത്തുന്ന ആദ്യ വനിതയായി ക്രിസ്റ്റീന കോച്ചും, ആദ്യ കറുത്ത വർഗക്കാരനായി വിക്ടർ ഗ്ലോവറും, ആദ്യ അമേരിക്കക്കാരനല്ലാത്ത വ്യക്തിയായി ജെറമി ഹാൻസനും ഇതോടെ മാറി.
2026 ഏപ്രിൽ ഒന്നിന് ഫ്ലോറിഡയിലെ കെന്നഡി സ്പേസ് സെന്ററിൽ നിന്നാണ് ലോകത്തിലെ ഏറ്റവും കരുത്തുറ്റ റോക്കറ്റായ എസ്.എൽ.എസ് (SLS) ഉപയോഗിച്ച് ആർട്ടിമിസ് 2 വിക്ഷേപിച്ചത്. 10 ദിവസം നീണ്ടുനിൽക്കുന്ന ഈ ദൗത്യം ചന്ദ്രനിൽ ഇറങ്ങാതെ, ഉപഗ്രഹത്തെ വലംവെച്ച് സുരക്ഷിതമായി ഭൂമിയിലേക്ക് മടങ്ങും. വരാനിരിക്കുന്ന ആർട്ടിമിസ് 3 ദൗത്യത്തിലൂടെ മനുഷ്യനെ വീണ്ടും ചന്ദ്രോപരിതലത്തിൽ ഇറക്കുന്നതിന് മുന്നോടിയായുള്ള നിർണായക പരീക്ഷണമാണിത്.
ഏപ്രിൽ 10-ഓടെ പസഫിക് സമുദ്രത്തിൽ പേടകം ഇറങ്ങുന്നതോടെ ദൗത്യം പൂർത്തിയാകും. മനുഷ്യനെ ചൊവ്വയിലെത്തിക്കാനുള്ള നാസയുടെ ദീർഘകാല പദ്ധതികൾക്കും ഈ വിജയം വലിയ കരുത്താകും.
Artemis 2 mission hits new milestone; These are the humans who have traveled the farthest distance from Earth
