പത്തനംതിട്ട കോന്നിയിൽ നടന്ന തിരഞ്ഞെടുപ്പ് കൺവെൻഷനിടെ ചോദ്യം ചോദിച്ച വ്യക്തിയോട് ക്ഷുഭിതനായി മുഖ്യമന്ത്രി പിണറായി വിജയൻ. പ്രസംഗത്തിനിടെ സദസ്സിൽ നിന്ന് ചോദ്യമുന്നയിച്ചയാളോട് “അത് വീട്ടിൽ പോയി ചോദിച്ചാൽ മതി” എന്നായിരുന്നു മുഖ്യമന്ത്രിയുടെ മറുപടി. കേരളത്തിന്റെ അടിസ്ഥാന വികസന ആവശ്യങ്ങളെക്കുറിച്ചും വിഭവപരിമിതിയെക്കുറിച്ചും മുഖ്യമന്ത്രി സംസാരിച്ചുകൊണ്ടിരിക്കെയാണ് സദസ്സിൽ നിന്ന് ഒരാൾ ‘സിഎമ്മേ ഒരു ചോദ്യം’ എന്ന് വിളിച്ചു ചോദിച്ചത്. ഇതിൽ പ്രകോപിതനായാണ് മുഖ്യമന്ത്രി രൂക്ഷമായി പ്രതികരിച്ചത്.
വികസന കാര്യങ്ങളിൽ സർക്കാരിന്റെ നേട്ടങ്ങൾ വിശദീകരിക്കുന്നതിനിടെയുണ്ടായ ഈ ഇടപെടൽ മുഖ്യമന്ത്രിയെ അസ്വസ്ഥനാക്കി. കേരളത്തിന്റെ വികസന ആവശ്യങ്ങൾ വളരെ കൂടുതലാണെന്നും എന്നാൽ വരുമാന സ്രോതസ്സുകൾ പരിമിതമാണെന്നും അദ്ദേഹം വിശദീകരിക്കുന്നതിനിടെയായിരുന്നു സംഭവം. തന്റെ പ്രസംഗം തടസ്സപ്പെടുത്തിയതിലുള്ള അതൃപ്തി പരസ്യമായി പ്രകടിപ്പിച്ച അദ്ദേഹം, ചോദ്യം ചോദിച്ചയാളെ അവഗണിച്ച് പ്രസംഗം തുടരുകയായിരുന്നു. ഈ മറുപടി രാഷ്ട്രീയ വൃത്തങ്ങളിൽ വലിയ ചർച്ചകൾക്ക് വഴിവെച്ചിട്ടുണ്ട്.
മുൻപ് സമാനമായ രീതിയിൽ പൊതുവേദികളിൽ ചോദ്യം ചോദിക്കുന്നവരോടും പ്രതിഷേധിക്കുന്നവരോടും മുഖ്യമന്ത്രി സ്വീകരിച്ചിട്ടുള്ള കർക്കശ നിലപാടുകൾ വീണ്ടും ചർച്ചയാകുകയാണ്. ജി. സുധാകരനെതിരെയുള്ള ‘ചെറ്റ’ പരാമർശത്തിന് പിന്നാലെ കോന്നിയിലെ ഈ പ്രതികരണം കൂടി വന്നതോടെ മുഖ്യമന്ത്രിയുടെ ശൈലിക്കെതിരെ പ്രതിപക്ഷം രംഗത്തെത്തിയിട്ടുണ്ട്. തിരഞ്ഞെടുപ്പ് വേളയിൽ വോട്ടർമാരോടും പൊതുജനങ്ങളോടും മുഖ്യമന്ത്രി കാണിക്കുന്ന ഈ സമീപനം ജനാധിപത്യവിരുദ്ധമാണെന്ന് യുഡിഎഫ് ആരോപിച്ചു. വരും ദിവസങ്ങളിൽ ഈ സംഭവം പ്രചാരണ വിഷയമാക്കാനാണ് പ്രതിപക്ഷത്തിന്റെ നീക്കം.
‘Ask at home’; CM Pinarayi Vijayan loses cool at questioner in Konni election rally
