ടെഹ്റാൻ: ഇറാനിലെ ഏക വാണിജ്യ ആണവനിലയമായ ബൂഷെറിന് നേരെ ആക്രമണമുണ്ടായതായി അന്താരാഷ്ട്ര ആണവോർജ്ജ ഏജൻസി (IAEA) അറിയിച്ചു. ചൊവ്വാഴ്ച വൈകുന്നേരമാണ് നിലയത്തിന് നേരെ ആക്രമണമുണ്ടായത്. എന്നാൽ ആക്രമണത്തിൽ പ്ലാൻ്റിന് കേടുപാടുകൾ സംഭവിക്കുകയോ ജീവനക്കാർക്ക് പരിക്കേൽക്കുകയോ ചെയ്തിട്ടില്ലെന്ന് ഇറാൻ അധികൃതർ ഐ.എ.ഇ.എയെ അറിയിച്ചു.
ഒരു ‘പ്രൊജക്റ്റൈൽ’ (മിസൈലോ ഡ്രോണോ പോലുള്ള വസ്തു) നിലയത്തിൻ്റെ പരിസരത്ത് പതിച്ചതായാണ് റിപ്പോർട്ട്. മേഖലയിൽ നിലനിൽക്കുന്ന സംഘർഷങ്ങൾക്കിടയിൽ ആണവ അപകടങ്ങൾ ഒഴിവാക്കാൻ എല്ലാ ഭാഗത്തുനിന്നും പരമാവധി സംയമനം പാലിക്കണമെന്ന് ഐ.എ.ഇ.എ ഡയറക്ടർ ജനറൽ റാഫേൽ മരിയാനോ ഗ്രോസി ആവശ്യപ്പെട്ടു.
ഇറാൻ്റെ തലസ്ഥാനമായ ടെഹ്റാനിൽ നിന്ന് ഏകദേശം 465 മൈൽ തെക്ക് ഭാഗത്താണ് ബൂഷെർ ആണവനിലയം സ്ഥിതി ചെയ്യുന്നത്. 1970-കളിൽ നിർമ്മാണം ആരംഭിച്ച ഈ നിലയം പിൽക്കാലത്ത് റഷ്യയുടെ സഹായത്തോടെയാണ് പൂർത്തിയാക്കിയത്. നേരത്തെ ഇറാൻ-ഇറാഖ് യുദ്ധസമയത്തും ഈ പ്ലാൻ്റ് പലതവണ ആക്രമിക്കപ്പെട്ടിട്ടുണ്ട്.
Attack on Iran’s nuclear plant; UN nuclear agency says no damage
