മണിപ്പൂരിൽ സമാധാനം പുനഃസ്ഥാപിക്കാനുള്ള നിർണ്ണായക നീക്കത്തിന്റെ ഭാഗമായി പുതിയ സർക്കാർ രൂപീകരിക്കാൻ ബിജെപി തീരുമാനിച്ചു. ബിജെപി നേതാവ് യുംനാം ഖേംചന്ദ് സിംഗിനെ നിയമസഭാ കക്ഷി നേതാവായി തിരഞ്ഞെടുത്തു. അദ്ദേഹം സംസ്ഥാനത്തിന്റെ അടുത്ത മുഖ്യമന്ത്രിയായി ചുമതലയേൽക്കും. ഗോത്ര വിഭാഗങ്ങൾക്കിടയിലുള്ള ഭിന്നത പരിഹരിക്കാൻ ലക്ഷ്യമിട്ട് കുക്കി വിഭാഗത്തിൽ നിന്നുള്ള വനിതയ്ക്കും നാഗ വിഭാഗത്തിന്റെ പ്രതിനിധിക്കുമാണ് ഉപമുഖ്യമന്ത്രി സ്ഥാനം നൽകുന്നത്. നാഗ പീപ്പിൾ ഫ്രണ്ടിനാണ് (NPF) രണ്ടാം ഉപമുഖ്യമന്ത്രി സ്ഥാനം.
സംസ്ഥാനത്തെ വംശീയ സംഘർഷങ്ങളെത്തുടർന്ന് ഒരു വർഷം മുൻപ് പ്രഖ്യാപിച്ച രാഷ്ട്രപതി ഭരണം ഈ മാസം അവസാനിക്കാനിരിക്കെയാണ് ഈ രാഷ്ട്രീയ നീക്കം. എല്ലാ വിഭാഗങ്ങൾക്കും അർഹമായ പ്രാതിനിധ്യം നൽകിക്കൊണ്ട് സർക്കാരിനെ സജ്ജമാക്കാനാണ് ബിജെപി കേന്ദ്ര നേതൃത്വത്തിന്റെ ശ്രമം. പുതിയ സർക്കാർ അധികാരമേൽക്കുന്നതോടെ മണിപ്പൂരിൽ ജനാധിപത്യ ഭരണസംവിധാനം പുനഃസ്ഥാപിക്കപ്പെടുമെന്നും ക്രമസമാധാനം മെച്ചപ്പെടുമെന്നുമാണ് പ്രതീക്ഷിക്കപ്പെടുന്നത്.
