കാലിഫോർണിയ: ജനുവരി 1-ന് അമേരിക്കയുടെ വിവിധ ഭാഗങ്ങളിൽ ശക്തമായ കാലാവസ്ഥാ വ്യതിയാനങ്ങൾ അനുഭവപ്പെട്ടു. കാലിഫോർണിയയിലെ പാസഡീനയിൽ നടന്ന 137-ാമത് റോസ് പരേഡ് (Rose Parade) കനത്ത മഴയെത്തുടർന്ന് വാർത്തകളിൽ ഇടംപിടിച്ചു. 2006-ന് ശേഷം ആദ്യമായാണ് ഈ പരേഡ് വേളയിൽ ഇത്ര ശക്തമായ മഴ ലഭിക്കുന്നത്. രാവിലെ 8 മണിക്ക് പരേഡ് ആരംഭിക്കുമ്പോൾ ഏകദേശം 58 ഡിഗ്രി ഫാരൻഹീറ്റ് (14.4 ഡിഗ്രി സെൽഷ്യസ്) തണുപ്പ് ആയിരുന്നു താപനില. തുടർന്ന് ഏകദേശം 1 മുതൽ 2 ഇഞ്ച് വരെ മഴ പെയ്യുകയും അത് പരേഡിനെ സാരമായി നനയ്ക്കുകയും ചെയ്തു. മഴയുണ്ടായിട്ടും ആയിരക്കണക്കിന് ആളുകൾ പരേഡ് കാണാൻ പാതയോരങ്ങളിൽ എത്തിയിരുന്നു. നിശ്ചലദൃശ്യങ്ങളും മ്യൂസിക് ബാൻഡുകളും മഴ നനഞ്ഞും തങ്ങളുടെ പ്രകടനം പൂർത്തിയാക്കി.
കാലിഫോർണിയയിലെ പാസഡീനയിൽ എല്ലാ വർഷവും ജനുവരി ഒന്നിന് (പുതുവർഷ ദിനത്തിൽ) അരങ്ങേറുന്ന ലോകപ്രസിദ്ധമായ ആഘോഷമാണ് റോസ് പരേഡ് . 1890-ൽ ആരംഭിച്ച ഈ പാരമ്പര്യം നൂറിലധികം വർഷങ്ങളായി തുടരുന്നു. പരേഡിലെ പ്രധാന ആകർഷണം മനോഹരമായി അലങ്കരിച്ച ഭീമാകാരമായ ‘ഫ്ലോട്ടുകൾ’ (Floats) ആണ്. ഇതിന്റെ പ്രത്യേകത, ഓരോ ഫ്ലോട്ടും പൂർണ്ണമായും സ്വാഭാവിക പൂക്കൾ, ഇലകൾ, വിത്തുകൾ, മരത്തൊലി തുടങ്ങിയ പ്രകൃതിദത്ത വസ്തുക്കൾ കൊണ്ട് മാത്രമേ അലങ്കരിക്കാവൂ എന്നതാണ്. ഫ്ലോട്ടുകൾക്ക് പുറമെ ലോകത്തിന്റെ വിവിധ ഭാഗങ്ങളിൽ നിന്നുള്ള പ്രശസ്തമായ മാർച്ചിംഗ് ബാൻഡുകളും, കുതിരപ്പടകളും പരേഡിൽ പങ്കെടുക്കും. ദക്ഷിണ കാലിഫോർണിയയിലെ മനോഹരമായ കാലാവസ്ഥയും ശീതകാലത്തും വിരിയുന്ന പൂക്കളും ലോകത്തിന് മുന്നിൽ പ്രദർശിപ്പിക്കാനാണ് ‘വാലി ഹണ്ട് ക്ലബ്’ 1890-ൽ ഈ പരേഡ് ആരംഭിച്ചത്.
അതേസമയം, 2026 ലെ ആദ്യ ദിവസം തന്നെ തെക്കൻ കാലിഫോർണിയയിൽ വെള്ളപ്പൊക്ക മുന്നറിയിപ്പുകളും ഒഴിപ്പിക്കൽ ഉത്തരവുകളും പുറപ്പെടുവിക്കേണ്ടിയും വന്നു. അമേരിക്കയുടെ മധ്യഭാഗങ്ങളിലും വടക്കുകിഴക്കൻ മേഖലകളിലും അതിശൈത്യവും മഞ്ഞുവീഴ്ചയുമാണ് പുതുവർഷത്തിൽ അനുഭവപ്പെട്ടത്. വിസ്കോൺസിൻ, മിഷിഗൺ, ഇല്ലിനോയി, ന്യൂജേഴ്സി, ന്യൂയോർക്ക്, ന്യൂ ഇംഗ്ലണ്ട് തുടങ്ങിയ പ്രദേശങ്ങളിൽ മഞ്ഞുവീഴ്ച ശക്തമായിരുന്നു.
ന്യൂയോർക്ക് നഗരത്തിൽ കഴിഞ്ഞ പത്ത് വർഷത്തിനിടയിലെ ഏറ്റവും കുറഞ്ഞ താപനിലയാണ് പുതുവത്സര തലേന്ന് രേഖപ്പെടുത്തിയത്. റോച്ചസ്റ്റർ, ബഫല്ലോ എന്നിവിടങ്ങളിൽ ആറ് ഇഞ്ചും പിറ്റ്സ്ബർഗിൽ നാല് ഇഞ്ചും മഞ്ഞുവീഴ്ചയുണ്ടായി.
മോശം കാലാവസ്ഥയെത്തുടർന്ന് ബോസ്റ്റൺ, സാൻ ഡീഗോ വിമാനത്താവളങ്ങളിൽ നിന്നുള്ള നിരവധി സർവീസുകൾ വൈകി.
California’s Rose Parade soaked in rain on New Year’s; first in 20 years. Snowfall in Midwest and Northeast
