ടെക്സസ് സർക്കാർ പുതിയ H-1B വിസ അപേക്ഷകൾക്ക് വിലക്കേർപ്പെടുത്തിയതിനു പിന്നാലെ, ഇന്ത്യൻ വംശജനായ റിപ്പബ്ലിക്കൻ നേതാവും ടെക്സസ് ജിഒപി ചെയർമാനുമായ അബ്രഹാം ജോർജിന് സോഷ്യൽ മീഡിയയിൽ ട്രോളുകൾ. ‘ന്യൂഡൽഹിയിലേക്കുള്ള ആദ്യ വിമാനം പിടിക്കൂ’ എന്നായിരുന്നു ഒരു ട്രോളറുടെ കമന്റ്.
ടെക്സസ് ഗവർണർ ഗ്രെഗ് ആബട്ട് സംസ്ഥാന ഏജൻസികളിലും പൊതു സർവകലാശാലകളിലും പുതിയ H-1B വിസ അപേക്ഷകൾ മരവിപ്പിക്കുന്നതായി പ്രഖ്യാപിച്ചതോടെയാണ് വിവാദം. ഫ്ലോറിഡയ്ക്ക് പിന്നാലെ H-1B വിസ പദ്ധതിക്കെതിരെ നടപടിയെടുക്കുന്ന രണ്ടാമത്തെ സംസ്ഥാനമാണ് ടെക്സസ്. ഫ്ലോറിഡ മാതൃകയിൽ ടെക്സസിലും നടപടി വേണമെന്ന് അബ്രഹാം ജോർജ് അടുത്തിടെ ആവശ്യപ്പെട്ടിരുന്നു. ദിവസങ്ങൾക്കകം തന്നെ ഗവർണർ ആബട്ട് വിലക്ക് പ്രഖ്യാപിച്ചു.
“ടെക്സസുകാർക്കാണ് മുൻഗണന. സംസ്ഥാന ഏജൻസികളും സർവകലാശാലകളും പുതിയ H-1B വിസ അപേക്ഷകൾ മരവിപ്പിക്കണം. തൊഴിലാളികളെ പരിശീലിപ്പിക്കാൻ ടെക്സസ് നികുതിദായകർ ബില്യൺകണക്കിന് ഡോളർ ചെലവഴിക്കുന്നു. ആ ജോലികൾ ടെക്സസുകാരിലേക്ക് തന്നെ പോകണം. അമേരിക്കയിലെ ഏറ്റവും ശക്തമായ സാമ്പത്തിക എഞ്ചിനാണ് ടെക്സസ്. അത് നിലനിർത്തും,” എന്ന് ഗവർണർ എക്സിൽ (ട്വിറ്റർ) കുറിച്ചു.
സംസ്ഥാനത്തെ സ്കൂളുകളിലും സർവകലാശാലകളിലും ജോലി ചെയ്യുന്ന H-1B ജീവനക്കാരുടെ പൂർണ പട്ടിക ആവശ്യപ്പെട്ടതിന് പിന്നാലെയാണ് ഗവർണറുടെ നടപടി. ടെക്സസ് യൂണിവേഴ്സിറ്റിയിലും ടെക്സസ് എ&എം യൂണിവേഴ്സിറ്റി ശൃംഖലയിലുമുള്ള H-1B നിയമനങ്ങളെക്കുറിച്ച് ചോദ്യങ്ങൾ ഉയർന്നതോടെയാണ് വിവാദം ആരംഭിച്ചത്.
“സ്വകാര്യ കമ്പനികളെ H-1B ഉപയോഗിക്കുന്നത് തടയാൻ ഗവർണർക്ക് സാധിക്കില്ല. അതിനാൽ, റിപ്പബ്ലിക്കൻ പിന്തുണക്കാർക്ക് H-1B ദുരുപയോഗത്തിനെതിരെ ശക്തമായ നിലപാട് സ്വീകരിക്കുന്നുവെന്ന സന്ദേശം നൽകാനുള്ള ശ്രമമാണ് ഇത്,” റൈസ് യൂണിവേഴ്സിറ്റിയിലെ രാഷ്ട്രീയശാസ്ത്ര പ്രൊഫസർ മാർക്ക് ജോൺസ് ബ്ലൂംബർഗിനോട് പറഞ്ഞു.
അതേസമയം, ടെക്സസിലെ സ്വകാര്യ കമ്പനികളെ ഈ വിലക്ക് ബാധിക്കില്ല. ഗവർണറുടെ നിയന്ത്രണത്തിലുള്ള സംസ്ഥാന ഏജൻസികൾക്ക് വിലക്ക് ബാധകമാകും. സംസ്ഥാന സർവകലാശാലകളും ഉന്നത വിദ്യാഭ്യാസ സ്ഥാപനങ്ങളും ഇതിന് കീഴിലാകും. നിലവിലുള്ള H-1B വിസകൾക്കും പുതുക്കലുകൾക്കും (renewal) എന്ത് സംഭവിക്കുമെന്ന് ഉത്തരവിൽ വ്യക്തമാക്കിയിട്ടില്ല.
‘Catch the first flight to New Delhi’; Indian-origin Republican leader trolled after Texas’s H-1B ban
