തിരുവനന്തപുരം: വരാനിരിക്കുന്ന നിയമസഭാ തെരഞ്ഞെടുപ്പിൽ എൽഡിഎഫിന് വൻ വിജയം ഉറപ്പാക്കാൻ മുഖ്യമന്ത്രി പിണറായി വിജയൻ മുന്നോട്ടുവെച്ച ‘മിഷൻ 110’ പ്രഖ്യാപനം നടപ്പിലാക്കുന്നതിനുള്ള തയ്യാറെടുപ്പുകൾ ആരംഭിച്ചു. പ്രത്യേക മന്ത്രിസഭാ യോഗത്തിൽ മുഖ്യമന്ത്രി ഈ ലക്ഷ്യം വിശദമാക്കി, 140 സീറ്റുകളിൽ 110ലധികം നേടി തുടർഭരണം ഉറപ്പാക്കുമെന്ന ആത്മവിശ്വാസം പ്രകടിപ്പിച്ചു. വികസന നേട്ടങ്ങളും ജനക്ഷേമ പദ്ധതികളും ജനങ്ങളിലെത്തിക്കുന്നതിനൊപ്പം കുറവുകൾ പരിഹരിക്കാനുള്ള 50 ദിവസത്തെ കർമപദ്ധതിയും യോഗത്തിൽ രൂപപ്പെടുത്തി. മന്ത്രിമാർക്ക് ജില്ലകളിലും വകുപ്പുകളിലും പ്രത്യേക ചുമതലകൾ നൽകി തെരഞ്ഞെടുപ്പ് തന്ത്രങ്ങൾ മെനഞ്ഞു.
തദ്ദേശ സ്വയംഭരണ തെരഞ്ഞെടുപ്പിലെ തിരിച്ചടി ഉണ്ടായെങ്കിലും സംസ്ഥാനത്ത് ഭരണവിരുദ്ധ വികാരമില്ലെന്നും വികസനത്തിലും സാമൂഹ്യക്ഷേമത്തിലും കേരളം മുന്നേറുകയാണെന്നും മുഖ്യമന്ത്രി വ്യക്തമാക്കി. വർഗീയ ശക്തികൾക്കെതിരായ ശക്തമായ നിലപാടും സർക്കാരിന്റെ നേട്ടങ്ങളും ജനങ്ങൾ മനസ്സിലാക്കുമെന്നാണ് എൽഡിഎഫിന്റെ വിലയിരുത്തൽ. മിഷൻ 110 യാഥാർഥ്യമാക്കാൻ മന്ത്രിമാരുടെ ഏകോപനത്തോടെ പദ്ധതികൾ പൂർത്തിയാക്കി ഉദ്ഘാടനങ്ങൾ നടത്താനും തീരുമാനമായി. എൽഡിഎഫ് ഘടകകക്ഷികളുടെ യോഗത്തിലും ഈ തന്ത്രങ്ങൾ വിശദമായി ചർച്ച ചെയ്യും.
എന്നാൽ ബിജെപി ഉൾപ്പെടെയുള്ള പ്രതിപക്ഷം ഈ ലക്ഷ്യത്തെ പരിഹസിച്ചുകൊണ്ടിരിക്കുകയാണ്. തദ്ദേശ തെരഞ്ഞെടുപ്പ് ഫലങ്ങൾ കണക്കിലെടുത്താൽ 110 സീറ്റ് ലക്ഷ്യം വലിയ വെല്ലുവിളിയാണെന്നാണ് വിലയിരുത്തൽ. എങ്കിലും ഭരണനേട്ടങ്ങൾ അടിസ്ഥാനമാക്കി ജനങ്ങളുടെ പിന്തുണ നേടാനുള്ള സമഗ്ര പദ്ധതിയുമായാണ് എൽഡിഎഫ് മുന്നോട്ടുള്ളത്. മൂന്നാം ഇടതുസർക്കാർ രൂപീകരിക്കാൻ മിഷൻ 110 വിജയകരമാകുമെന്ന പ്രതീക്ഷയിലാണ് മുഖ്യമന്ത്രി പിണറായി വിജയൻ.
എൽ ഡി എഫ് ജാഥ
തെരഞ്ഞെടുപ്പിൻ്റെ പശ്ചാത്തലത്തിൽ എൽഡിഎഫ് ജാഥ ഫെബ്രുവരി ഒന്നു മുതൽ 15 വരെ നടക്കും. മൂന്ന് മേഖലാജാഥകളാണ് ഉണ്ടാവുക. എംവി ഗോവിന്ദനും ബിനോയ് വിശ്വവും ജോസ് കെ മാണിയും ആയിരിക്കും ജാഥാ ക്യാപ്റ്റൻമാർ.
