പ്രമുഖ റിയൽ എസ്റ്റേറ്റ് ഗ്രൂപ്പായ കോൺഫിഡന്റ് ഗ്രൂപ്പിന്റെ ചെയർമാൻ ഡോ. സി.ജെ. റോയിയെ ബംഗളൂരുവിലെ വസതിയിൽ ജീവനൊടുക്കി. ഇൻകംടാക്സ് റെയ്ഡ് തുടർച്ചയായി നേരിടുന്നതിനിടെയാണ് അദ്ദേഹത്തിന്റെ വിയോഗം. തന്റെ ആത്മഹത്യാക്കുറിപ്പിൽ അന്വേഷണ ഏജൻസികളുടെ നിരന്തരമായ പീഡനമാണ് ഈ കടുത്ത തീരുമാനത്തിലേക്ക് നയിച്ചതെന്ന് അദ്ദേഹം ആരോപിച്ചതായി റിപ്പോർട്ടുകൾ സൂചിപ്പിക്കുന്നു. മൃതദേഹം പോസ്റ്റ്മോർട്ടം നടപടികൾക്കായി ആശുപത്രിയിലേക്ക് മാറ്റി. സ്വന്തം തോക്ക് ഉപയോഗിച്ച് വെടിവെച്ച് മരിച്ചെന്നാണ് വിവരം.
കഴിഞ്ഞ കുറച്ചു നാളുകളായി കോൺഫിഡന്റ് ഗ്രൂപ്പുമായി ബന്ധപ്പെട്ട സാമ്പത്തിക ഇടപാടുകളിൽ അന്വേഷണ ഏജൻസികൾ പരിശോധന നടത്തിവരികയായിരുന്നു. തന്റെ ബിസിനസ്സ് സാമ്രാജ്യം കെട്ടിപ്പടുക്കാൻ ഏറെ കഷ്ടപ്പെട്ടുവെന്നും എന്നാൽ അന്വേഷണങ്ങളുടെ പേരിൽ നേരിടേണ്ടി വന്ന മാനസിക സമ്മർദ്ദം താങ്ങാനാവുന്നില്ലെന്നും അദ്ദേഹം തന്റെ കുറിപ്പിൽ വ്യക്തമാക്കിയതായാണ് വിവരം. കേരളത്തിലും കർണാടകയിലുമായി നിരവധി വൻകിട പ്രോജക്റ്റുകൾ പൂർത്തിയാക്കിയ വ്യക്തിയാണ് ഡോ. റോയ്.
സി.ജെ. റോയിയുടെ മരണം റിയൽ എസ്റ്റേറ്റ് രംഗത്തും പ്രവാസി സമൂഹത്തിലും വലിയ ഞെട്ടലുണ്ടാക്കിയിട്ടുണ്ട്. സാമൂഹിക-സാംസ്കാരിക മേഖലകളിൽ സജീവമായിരുന്ന അദ്ദേഹം നിരവധി ജീവകാരുണ്യ പ്രവർത്തനങ്ങളിലും പങ്കാളിയായിരുന്നു. ഉന്നതതലത്തിലുള്ള അന്വേഷണ ഏജൻസികളുടെ നടപടികൾക്കെതിരെയും ബിസിനസ്സുകാർ നേരിടുന്ന സമ്മർദ്ദങ്ങളെക്കുറിച്ചും ഈ സംഭവം പുതിയ ചർച്ചകൾക്ക് വഴിതുറന്നിരിക്കുകയാണ്. ബംഗളൂരു പോലീസ് സംഭവത്തിൽ കേസെടുത്ത് അന്വേഷണം ആരംഭിച്ചു.
