വരാനിരിക്കുന്ന നിയമസഭാ തിരഞ്ഞെടുപ്പിൽ മുഖ്യമന്ത്രി പിണറായി വിജയൻ വീണ്ടും ജനവിധി തേടണമെന്ന് സി പി എം കേരള ഘടകം. ഭരണതുടർച്ചയും പാർട്ടിയുടെ കരുത്തും നിലനിർത്താൻ മുഖ്യമന്ത്രി തന്നെ മുന്നിൽ നിന്ന് നയിക്കണമെന്ന പൊതുവികാരമാണ് സംസ്ഥാന കമ്മിറ്റിക്കുള്ളതെന്ന് കേരള നേതൃത്വം, പൊളിറ്റ് ബ്യൂറോയെ അറിയിച്ചു. നിലവിലെ രാഷ്ട്രീയ സാഹചര്യത്തിൽ പിണറായി വിജയന്റെ സാന്നിധ്യം പാർട്ടിക്ക് വലിയ ആത്മവിശ്വാസം നൽകുമെന്നാണ് വിലയിരുത്തൽ.
രണ്ട് തവണ മത്സരിച്ചവർ മാറണമെന്ന കർശനമായ നിബന്ധന പിണറായി വിജയന്റെ കാര്യത്തിൽ ഒഴിവാക്കാനാണ് പാർട്ടി ആലോചിക്കുന്നത്. കഴിഞ്ഞ നിയമസഭാ തിരഞ്ഞെടുപ്പിൽ നടപ്പിലാക്കിയ ‘രണ്ട് ടേം’ നിബന്ധനയിൽ മുഖ്യമന്ത്രിക്ക് ഇളവ് നൽകുന്നത് പാർട്ടിക്കും സർക്കാരിനും ഗുണകരമാകുമെന്ന് ഭൂരിഭാഗം നേതാക്കളും അഭിപ്രായപ്പെട്ടു. ധർമ്മടം മണ്ഡലത്തിൽ നിന്ന് തന്നെ അദ്ദേഹം വീണ്ടും മത്സരിക്കാനാണ് സാധ്യത.
പാർട്ടിക്കുള്ളിലും മുന്നണിക്കുള്ളിലും പിണറായി വിജയനുള്ള സ്വീകാര്യതയും ഭരണമികവും ഉയർത്തിക്കാട്ടി തിരഞ്ഞെടുപ്പിനെ നേരിടാനാണ് ഇടത് മുന്നണിയുടെ തീരുമാനം. വികസനത്തുടർച്ച എന്ന മുദ്രാവാക്യം ഉയർത്തിപ്പിടിക്കുമ്പോൾ പിണറായി വിജയന്റെ നേതൃത്വം അനിവാര്യമാണെന്ന് പാർട്ടി ഘടകങ്ങൾ ചൂണ്ടിക്കാട്ടുന്നു. ഔദ്യോഗികമായ പ്രഖ്യാപനം വരും ദിവസങ്ങളിൽ പാർട്ടി കേന്ദ്രങ്ങൾ നടത്തുമെന്നാണ് സൂചന.
CPM State Unit Urges CM Pinarayi Vijayan to Contest Again in Kerala Assembly Elections 2026
