സി.പി.എം. ബന്ധം ഉപേക്ഷിച്ച് യുഡിഎഫ് സ്വതന്ത്രനായി അമ്പലപ്പുഴയിൽ മത്സരിക്കുന്ന മുതിർന്ന നേതാവ് ജി സുധാകരനെതിരെ രൂക്ഷമായ വ്യക്തിപരമായ കടന്നാക്രമണവുമായി ഡി.വൈ.എഫ്.ഐ. ആലപ്പുഴ ജില്ലാ സെക്രട്ടറി ജെയിംസ് സാമുവൽ. ജി സുധാകരൻ ഒരു പൊളിറ്റിക്കൽ സൈക്കോപ്പൊത്താണെന്നും വായിൽ തോന്നുന്നത് വിളിച്ചുപറയുന്ന സ്വഭാവമാണ് അദ്ദേഹത്തിന്റേതെന്നും ഫേസ്ബുക്ക് പോസ്റ്റിലൂടെ ജെയിംസ് വിമർശിച്ചു. സുധാകരൻ ചെയ്ത ഹീനമായ പ്രവർത്തികൾ തങ്ങൾക്കും പറയേണ്ടി വരുമെന്നും അങ്ങനെ സംഭവിച്ചാൽ അദ്ദേഹത്തിന് തലയിൽ മുണ്ടിട്ട് നടക്കേണ്ടി വരുമെന്നും പോസ്റ്റിൽ മുന്നറിയിപ്പ് നൽകുന്നു.
പാർട്ടിയിൽ ഒരാളെപ്പോലും വളർത്താൻ സുധാകരൻ തയ്യാറായിട്ടില്ലെന്നും മറിച്ച് നിരവധി വിദ്യാർത്ഥി-യുവജന നേതാക്കളുടെ ഭാവി തകർക്കുകയാണ് അദ്ദേഹം ചെയ്തതെന്നും ഡി.വൈ.എഫ്.ഐ. ആരോപിച്ചു. തനിക്ക് മുകളിൽ ആരും വളരരുതെന്ന നിർബന്ധബുദ്ധിയായിരുന്നു അദ്ദേഹത്തിന്. കഴിവുള്ളവരെയെല്ലാം വെട്ടിയൊതുക്കി തന്റെ പെട്ടി താങ്ങുന്നവർ മാത്രം പാർട്ടിയിൽ മതി എന്ന നിലപാടാണ് സുധാകരൻ എന്നും സ്വീകരിച്ചിരുന്നതെന്ന് ജെയിംസ് സാമുവൽ കുറ്റപ്പെടുത്തി.
ആലപ്പുഴയിലെ രാഷ്ട്രീയത്തിൽ വലിയ പ്രത്യാഘാതങ്ങൾ ഉണ്ടാക്കുന്നതാണ് ഈ പരസ്യ പ്രതികരണം. തിരഞ്ഞെടുപ്പ് സമയത്ത് മുതിർന്ന നേതാവിനെതിരെ യുവജന സംഘടനയുടെ ജില്ലാ സെക്രട്ടറി തന്നെ രംഗത്തെത്തിയത് രാഷ്ട്രീയ എതിരാളികൾക്കും ആയുധമായിട്ടുണ്ട്. സുധാകരൻ ഇതിന് എന്ത് മറുപടി നൽകുമെന്നാണ് രാഷ്ട്രീയ കേരളം ഉറ്റുനോക്കുന്നത്.
DYFI calls G Sudhakaran a ‘Political Psychopath’; sharp criticism from Alappuzha District Secretary
