കേന്ദ്ര ബജറ്റിൽ കേരളത്തെ അവഗണിച്ചെന്ന വിമർശനങ്ങൾ ശക്തമാകുന്നതിനിടെ, സംസ്ഥാനത്തെ റെയിൽവേ വികസനത്തിൽ വ്യക്തത വരുത്തി കേന്ദ്ര റെയിൽവേ മന്ത്രി അശ്വിനി വൈഷ്ണവ്. മെട്രോമാൻ ഇ. ശ്രീധരന്റെ നേതൃത്വത്തിൽ നടക്കുന്ന അതിവേഗ റെയിൽ പദ്ധതിയുമായി ബന്ധപ്പെട്ട പ്രവർത്തനങ്ങൾക്ക് കേന്ദ്ര സർക്കാർ പൂർണ്ണ പിന്തുണ നൽകുമെന്ന് അദ്ദേഹം പ്രഖ്യാപിച്ചു. കേരളത്തിന്റെ റെയിൽ വികസനത്തെക്കുറിച്ച് ശ്രീധരനുമായി ചർച്ചകൾ നടത്തിയിട്ടുണ്ടെന്നും കേരളത്തിൽ അതിവേഗ റെയിൽവേ വരുമെന്ന് താൻ ഉറപ്പ് നൽകുന്നുവെന്നും മന്ത്രി വ്യക്തമാക്കി. എന്നാൽ, പദ്ധതി എന്ന് യാഥാർത്ഥ്യമാകുമെന്ന കാര്യത്തിൽ കൂടുതൽ വ്യക്തത നൽകാൻ അദ്ദേഹം തയ്യാറായില്ല.
ഇത്തവണത്തെ ബജറ്റിൽ കേരളത്തിന് റെയിൽവേ വിഹിതമായി 3795 കോടി രൂപയാണ് അനുവദിച്ചിരിക്കുന്നത്. ഇത് യുപിഎ സർക്കാരിന്റെ കാലത്തെക്കാൾ പത്തിരട്ടിയാണെന്ന് മന്ത്രി ചൂണ്ടിക്കാട്ടി. മംഗലാപുരം – ഷൊർണ്ണൂർ നാലാം പാതയുടെ ഡിപിആർ നടപടികളും ഷൊർണ്ണൂർ – എറണാകുളം മൂന്നാം പാതയുടെ ഫീൽഡ് സർവേയും പുരോഗമിക്കുകയാണ്. ശബരിപ്പാതയുടെ കാര്യത്തിൽ ആവശ്യമായ എല്ലാ നടപടികളും പൂർത്തിയായതായും തിരുനാവായ – ഗുരുവായൂർ പുതിയ പാത പ്രഖ്യാപിച്ചതായും മന്ത്രി അറിയിച്ചു. റെയിൽവേയുമായി ബന്ധപ്പെട്ട ഭൂമി ഏറ്റെടുക്കൽ വേഗത്തിലാക്കാൻ ആവശ്യപ്പെട്ട് സംസ്ഥാന മുഖ്യമന്ത്രിക്ക് പുതിയ കത്ത് നൽകുമെന്നും അദ്ദേഹം കൂട്ടിച്ചേർത്തു.
രാജ്യത്ത് പുതുതായി ഏഴ് ബുള്ളറ്റ് ട്രെയിൻ പാതകൾ കൂടി പ്രഖ്യാപിക്കുമെന്നും അതിൽ അഞ്ചെണ്ണം ദക്ഷിണ പടിഞ്ഞാറൻ ഇന്ത്യയെ കേന്ദ്രീകരിച്ചായിരിക്കുമെന്നും അശ്വിനി വൈഷ്ണവ് വ്യക്തമാക്കി. എറണാകുളത്തെ ഡീസൽ ഷെഡുമായി ബന്ധപ്പെട്ട് ഉയരുന്ന വിവാദങ്ങൾ അനാവശ്യമാണെന്നും റെയിൽവേയുടെ വികസന പ്രവർത്തനങ്ങളെ തടസ്സപ്പെടുത്തുന്ന നീക്കങ്ങളാണ് സംസ്ഥാനത്ത് നടക്കുന്നതെന്നും അദ്ദേഹം കുറ്റപ്പെടുത്തി. കേരളത്തിലെ റെയിൽവേ അടിസ്ഥാന സൗകര്യങ്ങൾ വർദ്ധിപ്പിക്കുന്നതിൽ കേന്ദ്രം പ്രതിജ്ഞാബദ്ധമാണെന്നും ഇതിനായുള്ള പ്രവർത്തനങ്ങൾ വേഗത്തിലാക്കുമെന്നും മന്ത്രി വാർത്താസമ്മേളനത്തിൽ ഉറപ്പ് നൽകി.
