മുൻ അമേരിക്കൻ പ്രസിഡന്റ് ബിൽ ക്ലിന്റൺ അന്തരിച്ച ലൈംഗിക കുറ്റവാളി ജെഫ്രി എപ്സ്റ്റീൻ യുവതികളെയോ പെൺകുട്ടികളെയോ ലൈംഗികമായി പീഡിപ്പിക്കുന്നത് താൻ ഒരിക്കലും കണ്ടിട്ടില്ലെന്നും, എപ്സ്റ്റീൻ പരിചയപ്പെടുത്തിയ ആരുമായും താൻ ലൈംഗികബന്ധത്തിൽ ഏർപ്പെട്ടിട്ടില്ലെന്നും ഹൗസ് ഓവർസൈറ്റ് കമ്മിറ്റിയ്ക്ക് മൊഴി നൽകി. കഴിഞ്ഞ ആഴ്ച നടന്ന അടച്ചിട്ട മൊഴിയെടുപ്പിന്റെ വീഡിയോ ദൃശ്യങ്ങൾ തിങ്കളാഴ്ച പുറത്തുവിട്ടിരുന്നു. മുൻ വിദേശകാര്യ സെക്രട്ടറി ഹിലരി ക്ലിൻ്റണും മൊഴി നൽകിയിരുന്നു.
റിപ്പബ്ലിക്കൻ പാർട്ടി നിയന്ത്രിക്കുന്ന കമ്മിറ്റിയാണ് ന്യൂയോർക്കിലെ ചപ്പക്വയിൽ ക്ലിന്റൺ ദമ്പതികളെ വേർതിരിച്ച് ചോദ്യം ചെയ്തത്. എപ്സ്റ്റീനെയും അദ്ദേഹത്തിന്റെ കുറ്റത്തിൽ ശിക്ഷിക്കപ്പെട്ട സഹപ്രവർത്തകയായ ഗിസ്ലെയ്ൻ മാക്സ്വെൽനെയും കുറിച്ചുള്ള ഫെഡറൽ അന്വേഷണങ്ങൾ എങ്ങനെ കൈകാര്യം ചെയ്തുവെന്നതിനെക്കുറിച്ചുള്ള അന്വേഷണത്തിന്റെ ഭാഗമായിരുന്നു ഇത്.
വെള്ളിയാഴ്ച ബിൽ ക്ലിന്റണിനെ ചോദ്യം ചെയ്തപ്പോൾ, “എപ്സ്റ്റീൻ യുവതികളെ ലൈംഗികമായി പീഡിപ്പിക്കുന്നത് കണ്ടിട്ടുണ്ടോ?” എന്ന ചോദ്യത്തിന് അദ്ദേഹം “ഇല്ല” എന്ന് മറുപടി നൽകി. “യുവതികളിൽ നിന്ന് മസാജ് സ്വീകരിക്കുന്നത് കണ്ടിട്ടുണ്ടോ?” എന്ന ചോദ്യത്തിനും “എനിക്ക് ഓർമ്മയില്ല” എന്നു പറഞ്ഞു. എപ്സ്റ്റീൻ ലൈംഗിക വിഷയങ്ങൾ ചർച്ച ചെയ്തിട്ടുണ്ടോ എന്ന ചോദ്യത്തിനും അദ്ദേഹം നിഷേധാത്മകമായി പ്രതികരിച്ചു.
പിന്നീട്, എപ്സ്റ്റീൻ മനുഷ്യക്കടത്തിലും ലൈംഗിക പീഡനത്തിലും ഏർപ്പെട്ടിരുന്നുവെന്ന് സൂചിപ്പിക്കുന്ന എന്തെങ്കിലും കണ്ടിട്ടുണ്ടോ എന്ന ചോദ്യത്തിന് കുറച്ച് നിമിഷങ്ങൾ ഇടവേള എടുത്ത് “അങ്ങനെ ഒന്നും ഞാൻ വിശ്വസിക്കുന്നില്ല” എന്നു മറുപടി നൽകി.ന്യായവകുപ്പ് പുറത്തുവിട്ട ഫോട്ടോകളിൽ എപ്സ്റ്റീനുമായി നടത്തിയ വിദേശയാത്രകളെക്കുറിച്ചും ക്ലിന്റണോട് ചോദിച്ചു. സ്വിമ്മിംഗ് പൂളിൽ ഒരു സ്ത്രീയോടൊപ്പം കാണുന്ന ചിത്രത്തെക്കുറിച്ച് ചോദിച്ചപ്പോൾ, ആ സ്ത്രീയെ തിരിച്ചറിയാനാകുന്നില്ലെന്ന് അദ്ദേഹം പറഞ്ഞു. “അവരുമായി ലൈംഗിക ബന്ധത്തിൽ ഏർപ്പെട്ടിട്ടുണ്ടോ?” എന്ന ചോദ്യത്തിന് ക്ലിന്റൺ “ഇല്ല” എന്ന് വ്യക്തമാക്കി.
വിമാനത്താവളത്തിൽ ഒരസ്ത്രീ മസാജ് ചെയ്യുന്നതായി കാണുന്ന മറ്റൊരു ചിത്രത്തെക്കുറിച്ച് ചോദിച്ചപ്പോൾ, തന്റെ കഴുത്ത് വേദനിച്ചതിനാൽ സഹായം സ്വീകരിച്ചതായി അദ്ദേഹം പറഞ്ഞു.എപ്സ്റ്റീന്റെ ഇരയായ വിർജീനിയ ഗിഫ്രെ അയച്ച ഇമെയിലിൽ, “വാനിറ്റി ഫെയർ” മാസികയിൽ എപ്സ്റ്റീനെക്കുറിച്ചുള്ള ലേഖനം എഴുതരുതെന്ന് താൻ ഭീഷണിപ്പെടുത്തിയെന്ന ആരോപണവും ക്ലിന്റൺ ശക്തമായി നിഷേധിച്ചു.
Epstein Files; Bill Clinton says he met Epstein through former Treasury Secretary Larry Summers
