പാം ബീച്ച് (ഫ്ലോറിഡ): 2000-കളുടെ മധ്യത്തിൽ ജെഫ്രി എപ്സ്റ്റീനെതിരെ നടന്ന അന്വേഷണത്തിനിടെ അന്നത്തെ പോലീസ് മേധാവിയെ ഡൊണാൾഡ് ട്രംപ് ഫോൺ ചെയ്ത് “നിങ്ങൾ അവനെ തടയുന്നതിന് നന്ദി” എന്ന് പറഞ്ഞതായി എഫ്ബിഐ രേഖ. 2019-ൽ എഫ്ബിഐ നടത്തിയ അഭിമുഖത്തിൽ പാം ബീച്ച് മുൻ പോലീസ് മേധാവി മൈക്കൽ റൈറ്റർ നൽകിയ മൊഴിയിലാണ് ഈ വിവരമെന്ന് റിപ്പോർട്ടുകൾ വ്യക്തമാക്കുന്നു.
“എല്ലാവർക്കും അറിയാമായിരുന്നു അവൻ ഇതൊക്കെ ചെയ്തുകൊണ്ടിരുന്നതെന്ന്” ട്രംപ് പറഞ്ഞതായും രേഖയിൽ പറയുന്നു. ഈ രേഖയെക്കുറിച്ച് ആദ്യം റിപ്പോർട്ട് ചെയ്തത് മയാമി ഹെറാൾഡ് ആണ്. എപ്സ്റ്റീന്റെ കുറ്റകൃത്യങ്ങളെക്കുറിച്ച് തനിക്ക് അറിവില്ലെന്ന നിലപാട് ട്രംപ് ആവർത്തിച്ചിട്ടുണ്ടെങ്കിലും, അന്വേഷണം പുറത്തുവന്ന സമയത്ത് തന്നെയാണ് ഈ ഫോൺകാൾ ഉണ്ടായതെന്നാണ് എഫ്ബിഐ രേഖയിലെ സൂചന. 2006 ജൂലൈയിലായിരുന്നു ട്രംപ് വിളിച്ചതെന്ന് സമയക്രമം അറിയാവുന്ന വ്യക്തികൾ പറയുന്നത് എന്നാണ് റിപ്പോർട്ടുകൾ.
മാർ-എ-ലാഗോ ക്ലബ്ബിൽ നിന്ന് എപ്സ്റ്റീനെ പുറത്താക്കിയതായും, ക്ലബ്ബിലെ സ്പായിൽ നിന്ന് ജീവനക്കാരെ വശീകരിച്ചതായി അറിഞ്ഞതിനെ തുടർന്നാണിതെന്നും ട്രംപ് പറഞ്ഞതായി മൊഴിയിൽ ഉൾപ്പെട്ടിട്ടുണ്ട്. ന്യൂയോർക്കിൽ എപ്സ്റ്റീൻ ‘വെറുപ്പുളവാക്കുന്ന ആളായി’ അറിയപ്പെട്ടിരുന്നുവെന്നും, ഗിസ്ലെയ്ൻ മാക്സ്വെൽ എപ്സ്റ്റീന്റെ പ്രധാന സഹായി ആണെന്നും ട്രംപ് പറഞ്ഞതായി രേഖ പറയുന്നു. കുട്ടികൾ സന്നിഹിതരായിരുന്ന ഒരു അവസരത്തിൽ എപ്സ്റ്റീനോടൊപ്പം എത്തിയപ്പോൾ താൻ ഉടൻ അവിടെ നിന്ന് മാറിയതായും, അന്വേഷണം ആരംഭിച്ചതായി അറിഞ്ഞപ്പോൾ ആദ്യം വിളിച്ചവരിൽ ഒരാളായിരുന്നു താനെന്നും ട്രംപ് അറിയിച്ചതായും എഫ്ബിഐ റിപ്പോർട്ടിൽ പറയുന്നു.
2005-ൽ ആരംഭിച്ച എപ്സ്റ്റീൻ അന്വേഷണത്തിൽ റൈറ്റർ നിർണായക പങ്ക് വഹിച്ചിരുന്നു. 14 വയസ്സുകാരികളടക്കം പ്രായപൂർത്തിയാകാത്ത പെൺകുട്ടികളെ മസാജ് എന്ന പേരിൽ ലൈംഗികമായി പീഡിപ്പിച്ചുവെന്ന ആരോപണത്തിലാണ് അന്വേഷണം നടന്നത്. പ്രാദേശിക പ്രോസിക്യൂട്ടർമാരുടെ നടപടികളോട് നിരാശ പ്രകടിപ്പിച്ച് 2006-ൽ റൈറ്റർ പരസ്യമായി രംഗത്തെത്തിയിരുന്നു. പിന്നീട് ഫെഡറൽ ഏജൻസികളുമായി ചേർന്ന് മറ്റൊരു അന്വേഷണം ആരംഭിച്ചെങ്കിലും, 2008-ൽ എപ്സ്റ്റീനുമായുള്ള ‘നോൺ-പ്രോസിക്യൂഷൻ’ കരാറിൽ അത് അവസാനിച്ചു. അതേസമയം, എഫ്ബിഐക്ക് നൽകിയ മൊഴിയെക്കുറിച്ചുള്ള ചോദ്യങ്ങൾക്ക് റൈറ്റർ പ്രതികരിച്ചില്ല.
Epstein investigation: ‘Thank you for stopping him’ — Former police chief says Trump called
