ഹോർമുസ് കടലിടുക്ക് തുറന്നു നൽകാനും കപ്പൽ ഗതാഗതം സുഗമമാക്കാനും ലക്ഷ്യമിട്ട് ബ്രിട്ടനൊപ്പം കൈകോർക്കാൻ ഫ്രാൻസ് തീരുമാനിച്ചു. ഹോർമുസിൽ കപ്പലുകൾ പ്രവേശിക്കുന്നത് തടയുമെന്ന അമേരിക്കൻ പ്രസിഡന്റ് ഡോണൾഡ് ട്രംപിന്റെ പ്രഖ്യാപനത്തിന് പിന്നാലെയാണ് ഫ്രഞ്ച് പ്രസിഡന്റ് ഇമ്മാനുവൽ മാക്രോണിന്റെ ഈ നിർണ്ണായക നീക്കം. വിഷയത്തിൽ ബ്രിട്ടൻ വിളിച്ചുചേർത്ത അന്താരാഷ്ട്ര യോഗത്തിൽ ഫ്രാൻസ് പങ്കെടുക്കും. മേഖലയിൽ സമാധാനം ഉറപ്പാക്കാനുള്ള പ്രതിരോധ നടപടികൾക്കാണ് മുൻഗണന നൽകുന്നതെന്ന് മാക്രോൺ വ്യക്തമാക്കി.
അതേസമയം, ട്രംപിന്റെ ഭീഷണിക്ക് കടുത്ത ഭാഷയിലാണ് ഇറാൻ മറുപടി നൽകുന്നത്. ഹോർമുസിൽ നിയന്ത്രണം ഏർപ്പെടുത്തിയാൽ പകരം ചെങ്കടലിലെ ബാബ് അൽ മന്ദബ് കടലിടുക്ക് ലക്ഷ്യമിട്ട് തിരിച്ചടി നൽകുമെന്ന് ഇറാൻ മുന്നറിയിപ്പ് നൽകി. ചെങ്കടലിൽ ഹൂതികളുമായുള്ള സംഘർഷം അവസാനിച്ചു വരുന്നതിനിടെ ഇറാന്റെ ഭാഗത്തുനിന്നുണ്ടായ ഈ പുതിയ നിലപാട് ആഗോളതലത്തിൽ വലിയ ആശങ്കയുണ്ടാക്കിയിട്ടുണ്ട്. ഹോർമുസ് തടയുമെന്ന അമേരിക്കൻ നിലപാട് പശ്ചിമേഷ്യയിൽ പുതിയൊരു യുദ്ധമുഖം തുറന്നേക്കുമെന്നാണ് വിലയിരുത്തൽ.
കപ്പലുകളിൽ നിന്ന് ഇറാൻ പണം പിരിക്കുന്നത് തടയാൻ ഹോർമുസ് അടച്ചിടുമെന്ന ട്രംപിന്റെ വെല്ലുവിളി അന്താരാഷ്ട്ര ജലപാതകളെ സംഘർഷത്തിലാക്കുമെന്ന് ഉറപ്പാണ്. ഇറാന്റെ കടുംപിടുത്തവും അമേരിക്കയുടെ ഭീഷണിയും ചരക്ക് നീക്കത്തെ സാരമായി ബാധിക്കുമെന്നതിനാൽ ഫ്രാൻസും ബ്രിട്ടനും ഉൾപ്പെടെയുള്ള രാജ്യങ്ങൾ പ്രതിരോധ നടപടികളുമായി മുന്നോട്ടുപോവുകയാണ്. ഇസ്ലാമാബാദിൽ നടന്ന ചർച്ചകൾ പരാജയപ്പെട്ടതും മേഖലയിലെ അസ്ഥിരത വർദ്ധിപ്പിക്കാൻ കാരണമായിട്ടുണ്ട്.
France partners with UK to keep Hormuz open amidst Trump’s blockade threat; Iran warns of retaliation in Red Sea
