സിപിഎം സംഘടിപ്പിച്ച ബഹുജന റാലിയെ പരിഹസിച്ച് മുതിർന്ന നേതാവ് ജി. സുധാകരൻ. അമ്പലപ്പുഴ മണ്ഡലത്തിൽ തനിക്കെതിരെ ഇന്നലെ സിപിഎം നടത്തിയ റാലിയിൽ ആളു കുറഞ്ഞതിനെയാണ് അദ്ദേഹം രൂക്ഷമായി പരിഹസിച്ചത്. അയ്യായിരം പേർ വരുമെന്ന് പറഞ്ഞ പരിപാടിയിൽ എങ്ങനെയാണ് രണ്ടായിരം പേർ മാത്രമായതെന്ന് അദ്ദേഹം ചോദിച്ചു. മണ്ഡലത്തിൽ മാത്രം 3500-ഓളം പാർട്ടി മെമ്പർമാരുള്ളപ്പോൾ റാലിയിൽ പങ്കെടുത്തവരുടെ എണ്ണം കുറഞ്ഞത് ചൂണ്ടിക്കാട്ടിയായിരുന്നു അദ്ദേഹത്തിന്റെ പ്രതികരണം. തന്നെ ആരും ഭയപ്പെടേണ്ടതില്ലെന്നും അദ്ദേഹം കൂട്ടിച്ചേർത്തു.
സിപിഎമ്മിനെതിരെയുള്ള വിമർശനങ്ങൾക്കിടയിൽ എംഎസ്എഫ് സംഘടിപ്പിച്ച ഇഫ്താർ വിരുന്നിൽ ജി. സുധാകരൻ പങ്കെടുത്തത് രാഷ്ട്രീയ വൃത്തങ്ങളിൽ വലിയ ചർച്ചയായിട്ടുണ്ട്. അമ്പലപ്പുഴ കമ്പിളിവളപ്പിൽ മുഹമ്മദ് അസ്ലം അനുസ്മരണത്തോടനുബന്ധിച്ച് നടത്തിയ സൗഹൃദ ഇഫ്താർ വിരുന്നിലാണ് അദ്ദേഹം അതിഥിയായെത്തിയത്. അടുത്ത കാലത്തായി പൊതുപരിപാടികളിൽ സജീവമായ അദ്ദേഹം, ഇത്തരം ചടങ്ങുകളിൽ പങ്കെടുക്കുന്നത് ചർച്ചയാവുകയാണ്.
കോൺഗ്രസ് നേതാവും ജില്ലാ പഞ്ചായത്ത് അംഗവുമായ എ.ആർ. കണ്ണൻ, യു.എം. കബീർ, എംഎസ്എഫ് നേതാവ് അൽത്താഫ് തുടങ്ങിയവർ ചടങ്ങിൽ സംബന്ധിച്ചിരുന്നു. പാർട്ടി വേദിയിൽ നിന്നുള്ള വിട്ടുനിൽക്കലും മറ്റ് സംഘടനകളുടെ പരിപാടികളിലെ സാന്നിധ്യവും സുധാകരനും പാർട്ടി നേതൃത്വവും തമ്മിലുള്ള അകൽച്ച വീണ്ടും വർദ്ധിപ്പിക്കുന്നതായാണ് സൂചന. അമ്പലപ്പുഴയിലെ രാഷ്ട്രീയ സാഹചര്യങ്ങളിൽ സുധാകരന്റെ ഓരോ നീക്കവും അതീവ പ്രാധാന്യത്തോടെയാണ് നിരീക്ഷിക്കപ്പെടുന്നത്.
G Sudhakaran mocks CPM’s mass rally; attends MSF’s Iftar party in Ambalappuzha
