ഇസ്രായേൽ ആക്രമണത്തിനിടെ ഗസ്സയിൽ ദാരുണമായി കൊല്ലപ്പെട്ട അഞ്ചുവയസ്സുകാരി ഹിന്ദ് റജബിന്റെ കഥ പറയുന്ന ‘ദി വോയ്സ് ഓഫ് ഹിന്ദ് റജബ്’ എന്ന ചിത്രത്തിന് ഓസ്കർ നോമിനേഷൻ. 98-ാമത് അക്കാദമി അവാർഡിലെ മികച്ച അന്താരാഷ്ട്ര ഫീച്ചർ ഫിലിം വിഭാഗത്തിലേക്കാണ് ട്യുണീഷ്യൻ എൻട്രിയായ ഈ ചിത്രം തിരഞ്ഞെടുക്കപ്പെട്ടത്. ഫ്രഞ്ച്-ടുണീഷ്യൻ സംവിധായിക കൗഥർ ബെൻ ഹനിയ ഒരുക്കിയ ഈ ഡോക്യുഡ്രാമ, യുദ്ധത്തിന്റെ ഭീകരതയെ ലോകത്തിന് മുന്നിൽ വീണ്ടും ചർച്ചയാക്കുകയാണ്.
2024 ജനുവരിയിൽ ഗസ്സ സിറ്റിയിൽ നിന്ന് കുടുംബത്തോടൊപ്പം പലായനം ചെയ്യുന്നതിനിടെയാണ് ഹിന്ദ് റജബ് സഞ്ചരിച്ച കാറിന് നേരെ ഇസ്രായേൽ സൈന്യം വെടിയുതിർത്തത്. കുടുംബാംഗങ്ങളുടെ മൃതദേഹങ്ങൾക്കിടയിൽ 70 മിനിറ്റോളം ജീവനുവേണ്ടി കേണ അഞ്ചുവയസ്സുകാരി റെഡ് ക്രസന്റിനെ വിളിച്ച് സഹായത്തിനായി അഭ്യർത്ഥിച്ചിരുന്നു. ഈ ഫോൺ സംഭാഷണങ്ങളിലെ യഥാർത്ഥ ഓഡിയോ ക്ലിപ്പുകൾ ഉപയോഗിച്ചാണ് സിനിമ നിർമ്മിച്ചിരിക്കുന്നത്. ഹിന്ദിനെ രക്ഷിക്കാനായി പുറപ്പെട്ട രണ്ട് ആരോഗ്യ പ്രവർത്തകരും അന്ന് സൈനികാക്രമണത്തിൽ കൊല്ലപ്പെട്ടിരുന്നു.
തന്റെ ഈ സിനിമ ഒരു വിനോദോപാധിയല്ലെന്നും മറിച്ച് ലോകം കേൾക്കാതെ പോയ ഒരു പിഞ്ചുകുട്ടിയുടെ ശബ്ദം ഉറക്കെ വിളിച്ചുപറയാനുള്ള മാധ്യമമാണെന്നും സംവിധായിക കൗഥർ ബെൻ ഹനിയ പറഞ്ഞു. നേരത്തെ വെനീസ് അന്താരാഷ്ട്ര ചലച്ചിത്ര മേളയിൽ ഗ്രാൻഡ് ജൂറി പുരസ്കാരമായ ‘സിൽവർ ലയൺ’ നേടിയ ഈ ചിത്രം പ്രദർശനത്തിന് ശേഷം 23 മിനിറ്റ് നീണ്ട എഴുന്നേറ്റുനിന്നുള്ള ആദരവും (standing ovation) ഏറ്റുവാങ്ങിയിരുന്നു. 2026 മാർച്ചിൽ ലോസ് ഏഞ്ചൽസിൽ നടക്കുന്ന ഓസ്കർ വേദിയിൽ ഈ ചിത്രം ഫലസ്തീന്റെ നോവ് ലോകത്തിന് മുന്നിലെത്തിക്കും.
