വത്തിക്കാൻ/തിരുവനന്തപുരം: ക്രൈസ്തവ വിശ്വാസികൾ ഇന്ന് ഓശാന ഞായർ ആഘോഷിക്കുന്നു. ലോകത്തിൻ്റെ വിവിധ ഭാഗങ്ങളിലുള്ള ദേവാലയങ്ങളിൽ നടക്കുന്ന പ്രത്യേക ശുശ്രൂഷകൾക്കും കുരുത്തോല വെഞ്ചിരിപ്പിനും സഭാമേലധ്യക്ഷന്മാർ മുഖ്യകാർമ്മികത്വം വഹിക്കും.
വത്തിക്കാൻ ചത്വരം ഇന്ന് പതിനായിരക്കണക്കിന് വിശ്വാസികളെ സാക്ഷിയാക്കി വിശുദ്ധ വാരത്തിൻ്റെ ആരംഭം കുറിക്കും. റോം സമയം രാവിലെ 10 മണിക്ക് സെൻ്റ് പീറ്റേഴ്സ് സ്ക്വയറിൽ നടക്കുന്ന ദിവ്യബലിക്കും കുരുത്തോല വെഞ്ചിരിപ്പിനും ലെയോ പാപ്പ മുഖ്യകാർമ്മികനാകും. പാപ്പയായി തിരഞ്ഞെടുക്കപ്പെട്ട ശേഷമുള്ള അദ്ദേഹത്തിൻ്റെ ആദ്യ വിശുദ്ധ വാരമാണിത്.
കേരളത്തിലെ വിവിധ ക്രൈസ്തവ വിഭാഗങ്ങളുടെ നേതൃത്വത്തിലും വിപുലമായ ചടങ്ങുകൾ നടക്കും. സെൻ്റ് മേരീസ് ബസിലിക്കയിൽ രാവിലെ 7 മണിക്ക് നടക്കുന്ന തിരുക്കർമ്മങ്ങൾക്ക് സിറോ മലബാർ സഭ മേജർ ആർച്ച് ബിഷപ്പ് മാർ റാഫേൽ തട്ടിൽ നേതൃത്വം നൽകും.
പട്ടം സെൻ്റ് മേരീസ് കത്തീഡ്രലിൽ മലങ്കര കത്തോലിക്കാ സഭ മേജർ ആർച്ച് ബിഷപ്പ് കർദ്ദിനാൾ മാർ ബസേലിയോസ് ക്ലീമിസ് കാതോലിക്കാബാവ രാവിലെ 6.30-ന് ആരംഭിക്കുന്ന ശുശ്രൂഷകൾക്ക് നേതൃത്വം നൽകും. കോട്ടയം പാമ്പാടി ദയറായിൽ ഓർത്തഡോക്സ് സഭയുടെ ശുശ്രൂഷകൾക്ക് ബസേലിയോസ് മാർത്തോമ്മാ മാത്യൂസ് തൃതീയൻ കാതോലിക്കാബാവ മുഖ്യകാർമ്മികത്വം വഹിക്കും.
പാളയം സെൻ്റ് ജോസഫ് കത്തീഡ്രലിൽ തിരുവനന്തപുരം ലത്തീൻ അതിരൂപത ആർച്ച് ബിഷപ്പ് ഡോ. തോമസ് ജെ. നെറ്റോ രാവിലെ 7 മണിക്ക് ആരംഭിക്കുന്ന പൊന്തിഫിക്കൽ ദിവ്യബലിക്കും കുരുത്തോല വെഞ്ചിരിപ്പിനും നേതൃത്വം നൽകും. പൊൻപള്ളി സെൻ്റ് ജോർജ് യാക്കോബായ പള്ളിയിൽ യാക്കോബായ സഭ ശ്രേഷ്ഠ ബാവ ബസേലിയോസ് ജോസഫ് പ്രഥമൻ കാതോലിക്ക ശുശ്രൂഷകൾക്ക് നേതൃത്വം നൽകും.
വിവിധ ദേവാലയങ്ങളിൽ കുരുത്തോല വെഞ്ചിരിപ്പിന് പുറമെ പ്രദക്ഷിണം, വിശുദ്ധ കുർബാന, കുരിശിൻ്റെ വഴി തുടങ്ങിയ ചടങ്ങുകളും നടക്കും. വിശുദ്ധ വാരത്തിൻ്റെ തുടക്കം കുറിച്ചുകൊണ്ട് വിശ്വാസികൾ വ്രതശുദ്ധിയോടെ പീഡാനുഭവ വാരത്തിലേക്ക് പ്രവേശിക്കുകയാണ്.
Holy Week begins, Pope Leo XIII at the Vatican and church leaders in Kerala will lead the liturgical services
