പശ്ചിമേഷ്യയിൽ ഇസ്രയേൽ-അമേരിക്ക സഖ്യവും ഇറാനും തമ്മിലുള്ള സൈനിക നീക്കങ്ങൾ അതിരൂക്ഷമാകുന്ന സാഹചര്യത്തിൽ ആശങ്ക പ്രകടിപ്പിച്ച് മെഗാസ്റ്റാർ മമ്മൂട്ടി. ലോകത്ത് ഇപ്പോൾ നടന്നുകൊണ്ടിരിക്കുന്ന യഥാർത്ഥ യുദ്ധത്തിൽ ആര് ജയിക്കുമെന്ന് അറിയില്ലെന്നും, എന്നാൽ ആത്യന്തികമായി മാനവികതയും മനുഷ്യരും ജയിക്കണം എന്നാണ് തന്റെ ആഗ്രഹമെന്നും അദ്ദേഹം പറഞ്ഞു. സിനിമയിലെ ചർച്ചകളിലും തർക്കങ്ങളിലും യുദ്ധങ്ങൾ ഉണ്ടാകാറുണ്ടെന്നും ചിലപ്പോൾ ഒരാൾ ജയിക്കുമെന്നും മറ്റു ചിലപ്പോൾ രണ്ടു കൂട്ടരും തോൽക്കുമെന്നും അദ്ദേഹം കൂട്ടിച്ചേർത്തു. ടി.വി. ചന്ദ്രന്റെ ചലച്ചിത്ര ജീവിതത്തിന്റെ 50-ാം വാർഷികാഘോഷ പരിപാടി ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
ഇറാൻ പരമോന്നത നേതാവ് ആയത്തുള്ള അലി ഖമനേയി കൊല്ലപ്പെട്ടതും തുടർന്ന് ഗൾഫ് മേഖലയിലടക്കം ഇറാൻ നടത്തുന്ന മിസൈൽ പ്രത്യാക്രമണങ്ങളും ലോകത്തെ മുനമ്പിൽ നിർത്തിയിരിക്കുകയാണ്. ഈ പശ്ചാത്തലത്തിലാണ് സമാധാനത്തിന് ഊന്നൽ നൽകിയുള്ള മമ്മൂട്ടിയുടെ വാക്കുകൾ ശ്രദ്ധേയമാകുന്നത്. യുദ്ധങ്ങൾ വിതയ്ക്കുന്ന നാശനഷ്ടങ്ങൾക്കും വിദ്വേഷത്തിനും അപ്പുറം മനുഷ്യത്വത്തിന് പ്രാധാന്യം നൽകണമെന്ന താരത്തിന്റെ നിലപാട് സോഷ്യൽ മീഡിയയിലും വലിയ ചർച്ചയായിട്ടുണ്ട്. ആഗോളതലത്തിൽ യുദ്ധഭീതി നിലനിൽക്കുമ്പോൾ മാനവികതയ്ക്കായി അദ്ദേഹം ഉയർത്തിയ ശബ്ദം ഏറെ ഗൗരവത്തോടെയാണ് ആരാധകരും സിനിമാലോകവും ഏറ്റെടുത്തിരിക്കുന്നത്.
‘Humanity Must Win’: Mammootty Expresses Deep Concern Over Escalating Middle East War
