ഇന്ത്യയും യൂറോപ്യൻ യൂണിയനും തമ്മിലുള്ള പ്രതിരോധ ബന്ധം കൂടുതൽ ശക്തമാക്കുന്നതിന്റെ ഭാഗമായി നിർണ്ണായകമായ സുരക്ഷാ കരാറിൽ ഇരുപക്ഷവും ഒപ്പുവെച്ചു. സമുദ്ര സുരക്ഷ, സൈനിക സാങ്കേതികവിദ്യ കൈമാറ്റം, തീവ്രവാദ വിരുദ്ധ പ്രവർത്തനങ്ങൾ എന്നിവയിൽ സഹകരിച്ച് പ്രവർത്തിക്കാൻ ലക്ഷ്യമിട്ടുള്ളതാണ് ഈ കരാർ. ആഗോളതലത്തിൽ നിലനിൽക്കുന്ന വെല്ലുവിളികൾ നേരിടുന്നതിനും ഇൻഡോ-പസഫിക് മേഖലയിലെ സമാധാനം ഉറപ്പാക്കുന്നതിനും ഈ തന്ത്രപ്രധാനമായ നീക്കം വലിയ മാറ്റങ്ങൾ കൊണ്ടുവരുമെന്ന് വിലയിരുത്തപ്പെടുന്നു. യു എസ് നയിക്കുന്ന നാറ്റോ സഖ്യത്തിൽ ചേരാതെ തന്നെ യൂറോപ്യൻ യൂണിയൻ നാറ്റോ സഖ്യകക്ഷിയേപ്പോലെയുള്ള പ്രാധാന്യമാണ് ഇന്ത്യയ്ക്ക് ഈ കരാറിലൂടെ നൽകുന്നത്.
കരാർ പ്രകാരം സൈനിക പരിശീലനങ്ങളിലും സംയുക്ത സൈനികാഭ്യാസങ്ങളിലും ഇരുപക്ഷവും കൂടുതൽ പങ്കാളിത്തം വഹിക്കും. നിർമ്മിത ബുദ്ധി (AI), സൈബർ സുരക്ഷ തുടങ്ങിയ ആധുനിക മേഖലകളിൽ സാങ്കേതിക വിദ്യ പങ്കുവെക്കാനും തീരുമാനമായിട്ടുണ്ട്. ചൈനയുടെ വർധിച്ചുവരുന്ന സാന്നിധ്യം ഇൻഡോ-പസഫിക് മേഖലയിൽ വെല്ലുവിളിയാകുന്ന പശ്ചാത്തലത്തിൽ, യൂറോപ്യൻ യൂണിയനും ഇന്ത്യയും തമ്മിലുള്ള ഈ ഐക്യം വലിയ രാഷ്ട്രീയ പ്രധാന്യമാണ് നേടുന്നത്.
പ്രതിരോധ മേഖലയിൽ സ്വയംപര്യാപ്തത കൈവരിക്കാനുള്ള ഇന്ത്യയുടെ ശ്രമങ്ങൾക്ക് ഈ സഹകരണം വലിയ കരുത്താകും. യൂറോപ്യൻ രാജ്യങ്ങളിൽ നിന്നുള്ള അത്യാധുനിക ആയുധ സാങ്കേതികവിദ്യകൾ ഇന്ത്യൻ സൈന്യത്തിന് ലഭ്യമാകാൻ ഈ കരാർ വഴിയൊരുക്കും. ബ്രസൽസിൽ നടന്ന ചർച്ചകൾക്കൊടുവിലാണ് കരാർ ഔദ്യോഗികമായി പ്രഖ്യാപിച്ചത്. ഇത് ഏഷ്യയിലെയും യൂറോപ്പിലെയും സുരക്ഷാ സമവാക്യങ്ങളിൽ വലിയ സ്വാധീനം ചെലുത്തുമെന്ന് പ്രതിരോധ വിദഗ്ധർ അഭിപ്രായപ്പെടുന്നു.
India and EU sign landmark security and defense pact to boost strategic cooperation
