ന്യൂഡൽഹി: റഷ്യയിൽ നിന്നുള്ള എണ്ണ ഇറക്കുമതി അവസാനിപ്പിക്കാൻ ഇന്ത്യ പ്രതിജ്ഞാബദ്ധമാണെന്ന് ഇന്ത്യയിലെ യുഎസ് അംബാസഡർ സെർജിയോ ഗോർ. ന്യൂഡൽഹിയിൽ നടന്ന ‘ഗ്ലോബൽ എഐ ഇംപാക്ട് സമ്മിറ്റിൻ്റെ’ ഭാഗമായാണ് അദ്ദേഹം ഈ കാര്യം വെളിപ്പെടുത്തിയത്. എണ്ണ സ്രോതസ്സുകളിൽ ഇന്ത്യ മാറ്റം വരുത്തുകയാണെന്നും, റഷ്യൻ എണ്ണ വാങ്ങുന്നത് സംബന്ധിച്ച് ഇന്ത്യ ഉറപ്പ് നൽകിയിട്ടുണ്ടെന്നും അദ്ദേഹം പറഞ്ഞു.
റഷ്യ-യുക്രെയ്ൻ യുദ്ധം അവസാനിക്കണമെന്ന് പ്രസിഡൻ്റിന് നിർബന്ധമുണ്ടെന്നും സമാധാനം പുനഃസ്ഥാപിക്കുന്നതിനായി ഈ സംഘർഷവുമായി ഏതെങ്കിലും തരത്തിൽ ബന്ധപ്പെട്ടു നിൽക്കുന്ന സാഹചര്യം അവസാനിപ്പിക്കാനാണ് അദ്ദേഹം ആഗ്രഹിക്കുന്നതെന്നും ഗോർ പറഞ്ഞു. ലോകത്തെ ഒരു രാജ്യവും റഷ്യയിൽ നിന്ന് എണ്ണ വാങ്ങരുതെന്നാണ് പ്രസിഡൻ്റ് ഡോണൾഡ് ട്രംപിൻ്റെ നിലപാടെന്നും അദ്ദേഹം വ്യക്തമാക്കി.
റഷ്യയ്ക്ക് പകരമായി വെനസ്വേലയിൽ നിന്ന് എണ്ണ വാങ്ങുന്നതിനായി ഇന്ത്യയുമായി അമേരിക്ക സജീവമായ ചർച്ചകൾ നടത്തുകയാണെന്നും അദ്ദേഹം കൂട്ടിച്ചേർത്തു. ഇന്ത്യയും അമേരിക്കയും തമ്മിലുള്ള ഇടക്കാല വ്യാപാര കരാർ ഉടൻ ഒപ്പിടുമെന്നും ഇതിൻ്റെ ഭാഗമായാണ് ഈ മാറ്റങ്ങളെന്നും സെർജിയോ ഗോർ സൂചിപ്പിച്ചു.
എണ്ണ ഇടപാടിൽ ഇരുരാജ്യങ്ങളും തമ്മിൽ ധാരണയായതായി ഗോർ വ്യക്തമാക്കി. “ഇന്ത്യ തങ്ങളുടെ എണ്ണ സ്രോതസ്സുകളിൽ മാറ്റം വരുത്തുന്നത് ഞങ്ങൾ കണ്ടു. ഇക്കാര്യത്തിൽ ഒരു പ്രതിബദ്ധതയുണ്ട്. ഇത് ഇന്ത്യയെ മാത്രം സംബന്ധിച്ചുള്ളതല്ല, ആരും റഷ്യൻ എണ്ണ വാങ്ങുന്നത് യുഎസ് ആഗ്രഹിക്കുന്നില്ല,” എഐ ഉച്ചകോടിക്കിടെ ഇന്ത്യ ‘പാക്സ് സിലിക്ക’ (Pax Silica) സംരംഭത്തിൽ ചേർന്നതിന് പിന്നാലെ അദ്ദേഹം പറഞ്ഞു.
എന്നാൽ, ഇന്ത്യയുടെ ഊർജ നയം ദേശീയ താൽപ്പര്യത്തിന് അനുസൃതമാണെന്നും, ചിലവ്, വിപണി സാഹചര്യം, ലഭ്യത, അപകടസാധ്യതകൾ എന്നിവ വിലയിരുത്തിയ ശേഷമാണ് എണ്ണക്കമ്പനികൾ എണ്ണ വാങ്ങുന്നതെന്നും ഇന്ത്യൻ വിദേശകാര്യ സെക്രട്ടറി വിക്രം മിസ്രി പിന്നീട് പ്രതികരിച്ചു.
അതേസമയം, റഷ്യൻ എണ്ണ ഇറക്കുമതി നിർത്തുന്ന കാര്യത്തിൽ ഇന്ത്യൻ വിദേശകാര്യ മന്ത്രാലയത്തിൽ നിന്ന് ഇതുവരെ ഔദ്യോഗിക സ്ഥിരീകരണം ഉണ്ടായിട്ടില്ല. റഷ്യയിൽ നിന്നുള്ള എണ്ണ ഇറക്കുമതി ഇന്ത്യ നിർത്തിയെന്ന അവകാശവാദങ്ങളെ റഷ്യ തള്ളിക്കളഞ്ഞിട്ടുമുണ്ട്.
”India committed to ending oil imports from Russia” – US Ambassador Sergio Gore
