വാഷിംഗ്ടൺ: റഷ്യയുമായുള്ള എണ്ണ വ്യാപാരം തുടരുന്ന രാജ്യങ്ങൾക്കെതിരെ കർശനമായ സാമ്പത്തിക നടപടികൾ സ്വീകരിക്കുന്ന ബില്ലിന് അമേരിക്കൻ പ്രസിഡന്റ് ഡോണൾഡ് ട്രംപ് ‘പച്ചക്കൊടി കാട്ടി’. ‘സാങ്ഷനിംഗ് റഷ്യ ആക്റ്റ് 2025’ (Sanctioning Russia Act of 2025) എന്ന ഉഭയകക്ഷി ബില്ല് ഇന്ത്യയുൾപ്പെടെയുള്ള രാജ്യങ്ങളെ പ്രതികൂലമായി ബാധിക്കുമെന്നാണ് വിലയിരുത്തൽ. റഷ്യയിൽ നിന്ന് എണ്ണയോ യുറേനിയമോ വാങ്ങുന്ന ഇന്ത്യ, ചൈന, ബ്രസീൽ തുടങ്ങിയ രാജ്യങ്ങളിൽ നിന്നുള്ള ഉൽപ്പന്നങ്ങൾക്ക് കുറഞ്ഞത് 500% തീരുവ ചുമത്താൻ ഈ ബില്ല് അധികാരം നൽകുന്നു.
റഷ്യയുടെ എണ്ണ വ്യാപാരം തടയുന്നതിലൂടെ വ്ളാഡിമിർ പുടിന്റെ യുദ്ധസന്നാഹങ്ങൾക്കുള്ള സാമ്പത്തിക സ്രോതസ്സുകൾ ഇല്ലാതാക്കുക എന്നതാണ് ഇതിലൂടെ ലക്ഷ്യം വയ്ക്കുന്നത്.
റിപ്പബ്ലിക്കൻ സെനറ്റർ ലിൻഡ്സി ഗ്രഹാമും ഡെമോക്രാറ്റിക് സെനറ്റർ റിച്ചാർഡ് ബ്ലൂമെന്താലും ചേർന്നാണ് ഈ ബില്ല് തയ്യാറാക്കിയത്. 2026 ജനുവരി 7-ന് ട്രംപുമായി നടത്തിയ കൂടിക്കാഴ്ചയ്ക്ക് ശേഷമാണ് ബില്ലിന് പ്രസിഡന്റ് പച്ചക്കൊടി കാട്ടിയത്.
അതേസമയം, റഷ്യൻ എണ്ണ ഇറക്കുമതിയുടെ പേരിൽ കഴിഞ്ഞ ഓഗസ്റ്റിൽ ഇന്ത്യയിൽ നിന്നുള്ള ഉൽപ്പന്നങ്ങൾക്ക് ട്രംപ് 50% തീരുവ ചുമത്തിയിരുന്നു. പുതിയ ബില്ല് പാസായാൽ ഇത് 500 ശതമാനമായി ഉയരും. യുഎസ് കോൺഗ്രസിൽ ഈ ബില്ല് വരും ആഴ്ചകളിൽ വോട്ടെടുപ്പിന് വരാനിരിക്കുകയാണ്.
ഈ നീക്കം ഇന്ത്യയുടെ കയറ്റുമതി മേഖലയെ, പ്രത്യേകിച്ച് വസ്ത്രങ്ങൾ, കടൽ വിഭവങ്ങൾ (Shrimp) എന്നിവയെ സാരമായി ബാധിക്കുമെന്ന് ആശങ്കയുണ്ട്. ഇന്ത്യ റഷ്യയുമായുള്ള വ്യാപാര ബന്ധം ഉപേക്ഷിക്കണമെന്ന ശക്തമായ സമ്മർദ്ദമാണ് ഇതിലൂടെ അമേരിക്ക ലക്ഷ്യമിടുന്നത്. അതേസമയം, എണ്ണ ഇറക്കുമതി രാജ്യത്തിന്റെ ഊർജ്ജ സുരക്ഷയ്ക്ക് അനിവാര്യമാണെന്നാണ് ഇന്ത്യയുടെ നിലപാട്.
India may impose 500% tariff on oil trade with Russia; Trump greenlights new bill.
