ഇന്ത്യയിലെ മതസ്വാതന്ത്ര്യം വഷളാകുന്നുവെന്ന യുഎസ് കമ്മീഷൻ ഓൺ ഇന്റർനാഷണൽ റിലീജിയസ് ഫ്രീഡത്തിന്റെ (USCIRF) 2026-ലെ വാർഷിക റിപ്പോർട്ടിനെ കേന്ദ്ര വിദേശകാര്യ മന്ത്രാലയം ശക്തമായി അപലപിച്ചു. റിപ്പോർട്ടിലെ കണ്ടെത്തലുകൾ വസ്തുതാവിരുദ്ധവും പക്ഷപാതപരവുമാണെന്ന് വിദേശകാര്യ മന്ത്രാലയ വക്താവ് രൺധീർ ജയ്സ്വാൾ വ്യക്തമാക്കി. ഇന്ത്യയെ ‘പ്രത്യേക ആശങ്കയുള്ള രാജ്യമായി’ പ്രഖ്യാപിക്കണമെന്നും രാഷ്ട്രീയ സ്വയംസേവക് സംഘിനും (RSS) ഇന്ത്യയുടെ വിദേശ രഹസ്യാന്വേഷണ ഏജൻസിയായ റോയ്ക്കും (R&AW) മേൽ ഉപരോധം ഏർപ്പെടുത്തണമെന്നുമുള്ള റിപ്പോർട്ടിലെ ശുപാർശകൾ ബാഹ്യപ്രേരിതമാണെന്ന് ഇന്ത്യ കുറ്റപ്പെടുത്തി. തെറ്റായ സ്രോതസ്സുകളെയും രാഷ്ട്രീയ ലക്ഷ്യങ്ങളോടെയുള്ള ആഖ്യാനങ്ങളെയും അടിസ്ഥാനമാക്കിയാണ് കമ്മീഷൻ ഈ റിപ്പോർട്ട് തയ്യാറാക്കിയതെന്നും വിദേശകാര്യ മന്ത്രാലയം കൂട്ടിച്ചേർത്തു.
മറ്റൊരു രാജ്യത്തെ കാര്യങ്ങളിൽ ഇടപെടുന്നതിന് പകരം അമേരിക്കയിൽ ഇന്ത്യൻ സമൂഹത്തിന് നേരെ വർദ്ധിച്ചുവരുന്ന അസഹിഷ്ണുതയിലും ഹിന്ദു ക്ഷേത്രങ്ങൾക്ക് നേരെയുള്ള ആക്രമണങ്ങളിലും കമ്മീഷൻ ശ്രദ്ധ കേന്ദ്രീകരിക്കണമെന്ന് ഇന്ത്യ ആവശ്യപ്പെട്ടു. വസ്തുതകളെ വികലമായി അവതരിപ്പിക്കുന്നത് കമ്മീഷന്റെ തന്നെ വിശ്വാസ്യതയെ തകർക്കുമെന്നും മന്ത്രാലയം ഓർമ്മിപ്പിച്ചു. ലോകത്തിലെ ഏറ്റവും വലിയ ജനാധിപത്യ രാജ്യമായ ഇന്ത്യയുടെ ബഹുസ്വരതയെയും മതസൗഹാർദ്ദത്തെയും കുറിച്ചുള്ള യാഥാർത്ഥ്യങ്ങൾ ഉൾക്കൊള്ളാൻ കമ്മീഷൻ തയ്യാറാകണമെന്നും വിദേശകാര്യ മന്ത്രാലയം പ്രസ്താവനയിലൂടെ വ്യക്തമാക്കി.
India Slams USCIRF 2026 Report; Rejects Sanctions Proposal Against RSS and RAW as Biased and Motivated
