മുംബൈ: വിദേശ വിപണികളിൽ ഡോളറിനായുള്ള വർധിച്ച ആവശ്യകതയും കോർപ്പറേറ്റ് ഹെഡ്ജിംഗും മൂലമുണ്ടായ ഡിമാൻഡ് കാരണം വെള്ളിയാഴ്ച രൂപയുടെ മൂല്യം ദുർബലമായി. വെള്ളിയാഴ്ച വിപണി ക്ലോസ് ചെയ്യുമ്പോൾ യുഎസ് ഡോളറിനെതിരെ രൂപയുടെ മൂല്യം താഴ്ന്ന നിരക്കായ 90.16 ലാണ് എത്തിയത്. തലേദിവസം രൂപയുടെ മൂല്യം 90.02 ആയിരുന്നു. ഇതിനേക്കാൾ 14 പൈസ കുറവായിരുന്നു ഇന്നലെ.
വിദേശ നിക്ഷേപകർ വ്യാപകമായി ഡോളർ വാങ്ങിക്കൂട്ടുന്നതും ആഗോള സാമ്പത്തിക സാഹചര്യങ്ങളുമാണ് രൂപയുടെ ഈ തകർച്ചയ്ക്ക് പ്രധാന കാരണമായി ചൂണ്ടിക്കാണിക്കപ്പെടുന്നത്. വരും ദിവസങ്ങളിലും ഡോളറിനെതിരെയുള്ള സമ്മർദ്ദം തുടരാൻ സാധ്യതയുണ്ടെന്ന് വിപണി വിദഗ്ധർ വിലയിരുത്തുന്നു. “ആഭ്യന്തര ഓഹരി വിപണികളിലെ ബലഹീനതയും വിദേശ നിക്ഷേപകരുടെ വിൽപ്പനയും മൂലം രൂപയുടെ മൂല്യം ദുർബലമായി. യുഎസ് സാമ്പത്തിക ഡാറ്റയുടെ സ്വാധീനത്തിൽ ഡോളർ സൂചികയിലെ ചാഞ്ചാട്ടം കറൻസിയെ കൂടുതൽ ബാധിച്ചു,” എൽകെപി സെക്യൂരിറ്റീസിലെ ജതീൻ ത്രിവേദി പ്രതികരിച്ചതിങ്ങനെ.
യുഎസ് ഏർപ്പെടുത്താൻ സാധ്യതയുള്ള താരിഫുകളെക്കുറിച്ചുള്ള ആശങ്കകളും ആഗോള വിപണിയിലെ ഡോളറിന്റെ കരുത്തും രൂപയുടെ മൂല്യത്തകർച്ചയ്ക്ക് കാരണമായി.
കോർപ്പറേറ്റ് ഹെഡ്ജിംഗ് (Corporate Hedging).
ഒരു കമ്പനി അവരുടെ ബിസിനസ്സ് പ്രവർത്തനങ്ങളിൽ ഉണ്ടായേക്കാവുന്ന സാമ്പത്തിക നഷ്ടങ്ങൾ കുറയ്ക്കുന്നതിനായി സ്വീകരിക്കുന്ന മുൻകരുതൽ നടപടിയാണ് കോർപ്പറേറ്റ് ഹെഡ്ജിംഗ് (Corporate Hedging). ഭാവിയിൽ ഉണ്ടായേക്കാവുന്ന വിലക്കയറ്റം, കറൻസി മൂല്യത്തിലെ മാറ്റം, പലിശ നിരക്കിലെ വ്യതിയാനം എന്നിവയിൽ നിന്നുള്ള ആഘാതം കുറയ്ക്കാൻ എടുക്കുന്ന ഒരു ഇൻഷുറൻസ് പോലെയാണിത്. വിദേശ രാജ്യങ്ങളുമായി ഇടപാട് നടത്തുന്ന കമ്പനികൾ ഡോളർ പോലുള്ള കറൻസികളുടെ മൂല്യത്തിലുണ്ടാകുന്ന മാറ്റം മൂലം നഷ്ടം സംഭവിക്കാതിരിക്കാൻ ഹെഡ്ജിംഗ് ഉപയോഗിക്കുന്നു.
Indian rupee falls 14 paise to 90.16 against US dollar.
