അമേരിക്കയിലെ ഷിക്കാഗോയ്ക്ക് സമീപം ഉണ്ടായ വാഹനാപകടത്തിൽ ഇന്ത്യൻ വിദ്യാർത്ഥിനിയായ നവ്യ ഗഡുസു (25) മരിച്ചു. അപകടത്തിൽ മറ്റ് ആറുപേർക്ക് പരിക്കേറ്റതായി അധികൃതർ അറിയിച്ചു. ശനിയാഴ്ച ഇന്റർസ്റ്റേറ്റ് 65 ഹൈവേയിലായിരുന്നു അപകടം നടന്നത്. നവ്യ ഞായറാഴ്ച പുലർച്ചെ 12.16ന് മരണപ്പെട്ടുവെന്നാണ് ലേക്ക് കൗണ്ടി കൊറോണർ ഓഫീസ് നൽകിയ വിവരം.
സ്റ്റേറ്റ് പൊലീസ് പുറത്തുവിട്ട റിപ്പോർട്ട് പ്രകാരം, മെക്കാനിക്കൽ തകരാറിനെ തുടർന്ന് വളരെ പതുക്കെ സഞ്ചരിച്ചുകൊണ്ടിരുന്ന മിനിവാനെ പിന്തുടർന്നെത്തിയ മറ്റൊരു കാറിന്റെ ഡ്രൈവർ വാഹനം മറികടക്കാൻ ശ്രമിക്കുകയായിരുന്നു. ഇതിനിടെ കാർ മിനിവാനിന്റെ ഇടത് വശത്ത് ഇടിക്കുകയായിരുന്നു. ഇടിയുടെ ആഘാതത്തിൽ മിനിവാൻ നിയന്ത്രണം വിട്ട് റോഡരികിലെ കുഴിയിലേക്ക് മറിഞ്ഞുവീണതായി പൊലീസ് അറിയിച്ചു.
മെക്കാനിക്കൽ തകരാറിലായിരുന്ന വാഹനം അപകടത്തിൽപ്പെട്ടിട്ടില്ലെന്നും അധികൃതർ വ്യക്തമാക്കി. മിനിവാനിൽ മുന്നിലെ രണ്ട് സീറ്റുകൾ മാത്രമാണ് ഉണ്ടായിരുന്നതെന്നും ബാക്കിയുള്ള അഞ്ച് യാത്രക്കാരും സീറ്റ് ബെൽറ്റ് ധരിക്കാതെ മാങ്ങാ പെട്ടികളിന് മുകളിൽ ഇരിക്കുകയായിരുന്നുവെന്നും സ്റ്റേറ്റ് പൊലീസ് വെളിപ്പെടുത്തി.
നവ്യയുടെ മരണത്തിൽ ഷിക്കാഗോയിലെ ഇന്ത്യൻ കോൺസുലേറ്റ് ജനറൽ അനുശോചനം രേഖപ്പെടുത്തി. “ഷിക്കാഗോയ്ക്ക് സമീപം നടന്ന വാഹനാപകടത്തിൽ ഇന്ത്യൻ വിദ്യാർത്ഥിനി നവ്യ ഗഡുസു മരണപ്പെട്ടത് ഏറെ ദുഃഖകരമാണ്. ഈ ദുഃഖകരമായ സമയത്ത് കുടുംബത്തിനും സുഹൃത്തുകൾക്കും അനുശോചനം അറിയിക്കുന്നു,” എന്ന് കോൺസുലേറ്റ് എക്സിൽ കുറിച്ചു. അപകടത്തിൽ പരിക്കേറ്റവരെ സഹായിക്കുന്നതിനായി കുടുംബാംഗങ്ങളുമായും സുഹൃത്തുക്കളുമായും സമൂഹ പ്രതിനിധികളുമായും കോൺസുലേറ്റ് ബന്ധപ്പെടുന്നുണ്ടെന്നും അറിയിച്ചു.
A 25-year-old Indian student Navya Gadusu was killed while six others were injured in a road accident on Saturday on Interstate 65 near Chicago in the United States.
