ന്യൂഡൽഹി: അസമിലെ ഹൈവേയിൽ നിർമ്മിച്ച രാജ്യത്തെ ആദ്യത്തെ എമർജൻസി ലാൻഡിംഗ് ഫെസിലിറ്റി (ELF) പ്രധാനമന്ത്രി നരേന്ദ്ര മോദി ശനിയാഴ്ച രാവിലെ ഉദ്ഘാടനം ചെയ്തു. ഇന്ത്യൻ വ്യോമസേനയുടെ സി-130ജെ സൂപ്പർ ഹെർക്കുലീസ് വിമാനത്തിലാണ് അദ്ദേഹം ഈ ചരിത്രപ്രസിദ്ധമായ ലാൻഡിംഗ് നടത്തിയത്. അസമിലെ ദിബ്രുഗഡ് ജില്ലയിലെ മോറാൻ ബൈപാസിനോട് ചേർന്നുള്ള ദേശീയപാത-37ലാണ് ഈ റൺവേ സ്ഥിതി ചെയ്യുന്നത്.
വടക്കുകിഴക്കൻ ഇന്ത്യയിലെ ഇത്തരത്തിലുള്ള ആദ്യത്തെ ഹൈവേ അധിഷ്ഠിത ലാൻഡിംഗ് സ്ട്രിപ്പാണിത്. ഏകദേശം 100 കോടി രൂപ ചിലവഴിച്ചാണ് 4.2 കിലോമീറ്റർ നീളമുള്ള ഈ ഹൈവേ റൺവേ നിർമ്മിച്ചത്. പ്രതിരോധ ആവശ്യങ്ങൾക്കും പ്രകൃതിക്ഷോഭങ്ങൾ പോലുള്ള അടിയന്തര സാഹചര്യങ്ങളിൽ വിമാനങ്ങൾ ഇറക്കാനും ഈ സൗകര്യം പ്രയോജനപ്പെടും. യുദ്ധവിമാനങ്ങൾക്കും ചരക്ക് വിമാനങ്ങൾക്കും ഇവിടെ ഇറങ്ങാൻ സാധിക്കും.
അസം മുഖ്യമന്ത്രി ഹിമന്ത ബിശ്വ ശർമ്മ, എയർ ചീഫ് മാർഷൽ എ.പി. സിംഗ് എന്നിവരും ഈ ചടങ്ങിൽ പങ്കെടുത്തു. ഈ ഉദ്ഘാടനത്തിന് മുന്നോടിയായി സുഖോയ്-30 MKI, റഫാൽ തുടങ്ങിയ യുദ്ധവിമാനങ്ങൾ ഉപയോഗിച്ച് വ്യോമസേന വിജയകരമായ ട്രയൽ റൺ നടത്തിയിരുന്നു.
India’s first emergency landing facility on Assam highway; PM Narendra Modi makes historic inauguration
