അമേരിക്കയുമായുള്ള നയതന്ത്ര ബന്ധങ്ങളിൽ മാറ്റങ്ങൾ പ്രകടമാകുന്നതിനിടെ റഷ്യയുമായി ചേർന്ന് പുതിയ നീക്കങ്ങൾക്കൊരുങ്ങി ഇറാൻ. ഇതിന്റെ ഭാഗമായി ഇന്ത്യൻ മഹാസമുദ്രത്തിന്റെ വടക്കൻ മേഖലയിലും ഒമാൻ കടലിലും നാളെ (ഫെബ്രുവരി 19) ഇറാനും റഷ്യയും സംയുക്ത നാവികാഭ്യാസം നടത്തും. സമുദ്ര സുരക്ഷ ഉറപ്പാക്കുന്നതിനും ഭീകരവാദത്തെ പ്രതിരോധിക്കുന്നതിനുമാണ് ഈ അഭ്യാസപ്രകടനമെന്നാണ് ഔദ്യോഗിക വിശദീകരണം. സൈനിക സഹകരണത്തിന് പുറമെ, റഷ്യയിൽ നിന്ന് വൻതോതിൽ പ്രകൃതിവാതകം ഇറക്കുമതി ചെയ്യാനുള്ള നിർണ്ണായക സാമ്പത്തിക കരാറിലും ഇരുരാജ്യങ്ങളും ഒപ്പുവെച്ചിട്ടുണ്ട്.
അതേസമയം, ഇറാൻ-അമേരിക്ക ആണവ കരാറുമായി ബന്ധപ്പെട്ട ചർച്ചകളിലും നിർണ്ണായകമായ പുരോഗതി ദൃശ്യമാണ്. അഞ്ച് വർഷത്തേക്ക് യുറേനിയം സമ്പുഷ്ടീകരണം നിർത്തിവെക്കാൻ ഇറാൻ തയ്യാറായേക്കുമെന്നാണ് പുറത്തുവരുന്ന വിവരം. ഇതിന് പകരമായി ഇറാനെതിരെ നിലനിൽക്കുന്ന എണ്ണ ഉപരോധം ഉൾപ്പെടെയുള്ള സാമ്പത്തിക നിയന്ത്രണങ്ങൾ അമേരിക്ക നീക്കണമെന്നതാണ് പ്രധാന ആവശ്യം. ആയുധ ആവശ്യങ്ങൾക്കായുള്ള സമ്പുഷ്ടീകരണം ഒഴിവാക്കി സിവിലിയൻ ആവശ്യങ്ങൾക്കായി മാത്രം ഇത് പരിമിതപ്പെടുത്താനും അന്താരാഷ്ട്ര മേൽനോട്ടം അംഗീകരിക്കാനും ഇറാൻ സന്നദ്ധത പ്രകടിപ്പിച്ചിട്ടുണ്ട്.
എന്നാൽ, ഈ ധാരണകൾക്കിടയിലും അന്തിമ കരാറിലെത്തുക എന്നത് വലിയ വെല്ലുവിളിയായി തുടരുകയാണ്. ഇറാന് ആണവ സൗകര്യങ്ങളേ പാടില്ലെന്ന ഇസ്രായേലിന്റെ കർക്കശമായ നിലപാട് ചർച്ചകളെ ബാധിച്ചേക്കാം. നിലവിലുള്ള യുറേനിയം ശേഖരം രാജ്യത്തിന് പുറത്തേക്ക് മാറ്റുന്ന കാര്യത്തിലും ഇതുവരെ വ്യക്തത വന്നിട്ടില്ല. എങ്കിലും, ആണവായുധങ്ങൾ നിർമ്മിക്കുന്നില്ലെന്ന് ഉറപ്പാക്കാൻ അന്താരാഷ്ട്ര ഏജൻസികളുടെ പരിശോധന തുടരാൻ ഇറാൻ സമ്മതിച്ചിട്ടുണ്ട്. പശ്ചിമേഷ്യൻ രാഷ്ട്രീയത്തിൽ വലിയ മാറ്റങ്ങൾക്ക് വഴിതെളിച്ചേക്കാവുന്ന ഈ നീക്കങ്ങളെ ലോകരാജ്യങ്ങൾ ഉറ്റുനോക്കുകയാണ്.
Iran and Russia to Hold Joint Naval Drill Amid Crucial Progress in Nuclear Deal Talks with US
