ഇറാനിൽ തുടരുന്ന ഭരണകൂട വിരുദ്ധ പ്രക്ഷോഭത്തിൽ സുരക്ഷാ സേനയുടെ ആക്രമണത്തിൽ 12,000 പേർ കൊല്ലപ്പെട്ടതായി ഞെട്ടിക്കുന്ന റിപ്പോർട്ട് പുറത്ത്. ‘ഇറാൻ ഇന്റർനാഷണൽ’ എന്ന വെബ്സൈറ്റാണ് ഈ സ്ഫോടനാത്മകമായ വെളിപ്പെടുത്തൽ നടത്തിയത്. ആധുനിക ഇറാന്റെ ചരിത്രത്തിലെ ഏറ്റവും വലിയ കൂട്ടക്കൊലപാതകമാണ് ഇക്കഴിഞ്ഞ ദിവസങ്ങളിൽ നടന്നതെന്ന് റിപ്പോർട്ട് ചൂണ്ടിക്കാട്ടുന്നു. മനുഷ്യാവകാശ സംഘടനകൾ നേരത്തെ പുറത്തുവിട്ട കണക്കുകളേക്കാൾ എത്രയോ മടങ്ങ് കൂടുതലാണിത്. ഇറാന്റെ ദേശീയ സുരക്ഷാ കൗൺസിൽ, പ്രസിഡന്റിന്റെ ഓഫീസ്, മെഡിക്കൽ ഉദ്യോഗസ്ഥർ എന്നിവരിൽ നിന്നുള്ള വിവരങ്ങൾ വിശകലനം ചെയ്താണ് ഈ കണക്കിലെത്തിയതെന്ന് വെബ്സൈറ്റ് അവകാശപ്പെടുന്നു.
പരമോന്നത നേതാവ് ആയത്തുള്ള അലി ഖമേനിയുടെ നേരിട്ടുള്ള ഉത്തരവ് പ്രകാരം പ്രവർത്തിക്കുന്ന ഇസ്ലാമിക് റെവല്യൂഷണറി ഗാർഡുകളും ബാസിജ് സേനയുമാണ് ഈ ക്രൂരമായ അടിച്ചമർത്തലിന് നേതൃത്വം നൽകിയത്. ജനുവരി 8, 9 തീയതികളിൽ രാത്രിയിലാണ് മിക്ക കൊലപാതകങ്ങളും നടന്നതെന്ന് റിപ്പോർട്ടിൽ പറയുന്നു. കൊല്ലപ്പെട്ടവരിൽ ഭൂരിഭാഗവും 30 വയസ്സിൽ താഴെയുള്ള യുവാക്കളാണ്. സാമ്പത്തിക പ്രതിസന്ധിയും വർദ്ധിച്ചുവരുന്ന ജീവിതച്ചെലവും മൂലം പൊട്ടിപ്പുറപ്പെട്ട പ്രക്ഷോഭം മൂന്നാം വാരത്തിലേക്ക് കടന്നതോടെയാണ് ഭരണകൂടം സായുധ സേനയെ ഉപയോഗിച്ച് പ്രക്ഷോഭകരെ ഇല്ലാതാക്കാൻ ശ്രമിച്ചത്.
പ്രക്ഷോഭം ശക്തമായതോടെ രാജ്യത്ത് പലയിടത്തും ഇന്റർനെറ്റ് വിച്ഛേദിച്ചിരിക്കുകയാണ്. അതിനാൽ പുറംലോകം അറിയുന്നതിനേക്കാൾ വലിയ ദുരന്തമാണ് ഇറാന്റെ ഉൾപ്രദേശങ്ങളിൽ നടക്കുന്നത്. പ്രക്ഷോഭത്തിന് കാരണം വിദേശ ‘ശത്രുക്കൾ’ ആണെന്ന് പ്രസിഡന്റ് മസൂദ് പെസെഷ്കിയാൻ ആരോപിക്കുമ്പോൾ, പൗരോഹിത്യ ഭരണം അവസാനിപ്പിക്കണമെന്ന തുറന്ന ആഹ്വാനവുമായി ജനങ്ങൾ തെരുവുകളിൽ ഉറച്ചുനിൽക്കുകയാണ്. അമേരിക്ക ഉൾപ്പെടെയുള്ള അന്താരാഷ്ട്ര ശക്തികൾ ഇറാന്റെ നടപടികളെ അപലപിച്ചെങ്കിലും, അടിച്ചമർത്തലിൽ നിന്ന് പിന്മാറാൻ ഭരണകൂടം തയ്യാറായിട്ടില്ല.
