മുൻകൂർ അനുമതിയില്ലാതെ ഹോർമുസ് കടലിടുക്ക് കടക്കാൻ ശ്രമിക്കുന്ന കപ്പലുകൾ തകർക്കുമെന്ന് ഇറാന്റെ മുന്നറിയിപ്പ്. അമേരിക്കയും ഇറാനും തമ്മിൽ രണ്ടാഴ്ചത്തെ വെടിനിർത്തൽ പ്രഖ്യാപിച്ചതിന് പിന്നാലെയാണ് ഇറാൻ നാവികസേന റേഡിയോ സന്ദേശത്തിലൂടെ കർശന നിർദ്ദേശം നൽകിയത്. കടലിടുക്കിലൂടെ സഞ്ചരിക്കാൻ ഇറാനിയൻ നാവികസേനയുടെ പ്രത്യേക അനുമതി വാങ്ങിയിരിക്കണമെന്നും അല്ലാത്തപക്ഷം കപ്പലുകൾ ആക്രമിക്കപ്പെടുമെന്നുമാണ് വാൾസ്ട്രീറ്റ് ജേണൽ റിപ്പോർട്ട് ചെയ്യുന്നത്.
ഹോർമുസ് പാതയിലൂടെ കടന്നുപോകുന്ന കപ്പലുകളിൽ നിന്ന് ടോൾ ഈടാക്കാനും ഇറാൻ തീരുമാനിച്ചിട്ടുണ്ട്. ഓരോ ബാരൽ എണ്ണയ്ക്കും ഒരു ഡോളർ വീതം ടോൾ നൽകണം. ഈ തുക ബിറ്റ്കോയിൻ പോലുള്ള ഡിജിറ്റൽ കറൻസികളിൽ മാത്രമേ സ്വീകരിക്കുകയുള്ളൂ എന്നാണ് റിപ്പോർട്ടുകൾ സൂചിപ്പിക്കുന്നത്. കപ്പലുകൾ തങ്ങളുടെ ചരക്ക് വിവരങ്ങൾ മുൻകൂട്ടി ഇ-മെയിൽ ചെയ്യണമെന്നും, അടയ്ക്കേണ്ട തുക അധികൃതർ അറിയിക്കുമെന്നും ഇറാൻ പെട്രോളിയം കയറ്റുമതി യൂണിയൻ വക്താവ് ഹമീദ് ഹൊസൈനി വ്യക്തമാക്കി.
വെടിനിർത്തൽ പ്രഖ്യാപനത്തിന് ശേഷവും മേഖലയിൽ യുദ്ധവിമാനങ്ങൾ നിരീക്ഷണം തുടരുന്നത് കപ്പലുകൾക്ക് വലിയ ഭീഷണിയുയർത്തുന്നുണ്ട്. സുരക്ഷാ പ്രശ്നങ്ങൾ ഭയന്ന് ഭൂരിഭാഗം കപ്പലുകളും യാത്ര തുടരാനാവാതെ കടലിൽ നങ്കൂരമിട്ടിരിക്കുകയാണ്. ലോകത്തിലെ എണ്ണ വിതരണത്തിന്റെ അഞ്ചിലൊന്നും കടന്നുപോകുന്ന തന്ത്രപ്രധാനമായ ഈ പാതയിൽ തങ്ങളുടെ ആധിപത്യം വിട്ടുകൊടുക്കില്ലെന്ന ഉറച്ച നിലപാടിലാണ് ഇറാൻ.
വരും ദിവസങ്ങളിൽ പാകിസ്താനിൽ വെച്ച് അമേരിക്കൻ-ഇറാൻ ഉദ്യോഗസ്ഥർ തമ്മിൽ നിർണ്ണായക കൂടിക്കാഴ്ച നടത്താൻ നിശ്ചയിച്ചിട്ടുണ്ട്. ഈ ചർച്ചകൾക്ക് മുന്നോടിയായി നിയന്ത്രിതമായ രീതിയിൽ കടലിടുക്ക് തുറന്നു കൊടുത്തേക്കുമെന്നും സൂചനകളുണ്ട്. എന്നിരുന്നാലും, പുതിയ ടോൾ നയവും ബിറ്റ്കോയിൻ ഇടപാടും അന്താരാഷ്ട്ര കപ്പൽ ഗതാഗത രംഗത്ത് വലിയ പ്രതിസന്ധികൾക്ക് കാരണമായേക്കാം.
Iran warns to destroy ships entering Hormuz without permit; demands toll payment in Bitcoin
