ബാഗ്ദാദ്: ഇറാഖി കുർദിസ്ഥാൻ പ്രസിഡൻ്റ് നെചിർവാൻ ബർസാനിയുടെ വസതിക്ക് നേരെ ആക്രമണം നടന്നതായി ഇറാഖി പ്രധാനമന്ത്രി മുഹമ്മദ് ഷിയ അൽ-സുഡാനിയുടെ ഓഫീസ് അറിയിച്ചു. മേഖലയിലെ സംഘർഷങ്ങളിലേക്ക് ഇറാഖിനെ വലിച്ചിഴയ്ക്കാനുള്ള പുറത്തുനിന്നുള്ള ശക്തികളുടെ ശ്രമങ്ങളെ അനുവദിക്കില്ലെന്ന് പ്രധാനമന്ത്രി വ്യക്തമാക്കി.
ആക്രമണത്തെ “യുദ്ധക്കൊതി” എന്നാണ് കുർദിഷ് നേതാവ് മസൂദ് ബർസാനി വിശേഷിപ്പിച്ചത്. കുർദിസ്ഥാൻ്റെ ഓരോ ഭാഗവും തങ്ങൾക്ക് വിലപ്പെട്ടതാണെന്നും ഇതിനെതിരെ ശക്തമായ നടപടി വേണമെന്നും അദ്ദേഹം ആവശ്യപ്പെട്ടു. അമേരിക്കൻ സ്റ്റേറ്റ് ഡിപ്പാർട്ട്മെൻ്റ് ആക്രമണത്തെ അതിശക്തമായി അപലപിച്ചു. അതേസമയം, ഇറാൻ്റെ ഇസ്ലാമിക് റെവല്യൂഷണറി ഗാർഡ് കോർപ്സും (IRGC) ഇതൊരു ഭീകരാക്രമണമാണെന്ന് പ്രസ്താവിച്ചു.
ഇറാഖിലെ യുഎസ് കേന്ദ്രങ്ങൾക്ക് നേരെ ഇറാൻ അനുകൂല സായുധ ഗ്രൂപ്പുകൾ നേരത്തെയും ആക്രമണം നടത്തിയിരുന്നു. കഴിഞ്ഞ ദിവസം എർബിലിലുണ്ടായ മിസൈൽ ആക്രമണത്തിൽ ആറ് കുർദിഷ് പെഷ്മെർഗ പോരാളികൾ കൊല്ലപ്പെട്ടിരുന്നു. പ്രാദേശിക സംഘർഷങ്ങളിൽ ഭാഗമാകാൻ താല്പര്യമില്ലെന്ന് ഇറാഖ് സർക്കാർ ആവർത്തിക്കുമ്പോഴും, ആഭ്യന്തരമായുണ്ടാകുന്ന ഇത്തരം ആക്രമണങ്ങൾ രാജ്യത്തിന് വലിയ വെല്ലുവിളിയാകുകയാണ്.
Iraq and US strongly condemn attack on Iraqi Kurdistan President’s residence
