ടെഹ്റാൻ: ഇറാനിലുടനീളമുള്ള റെയിൽവേ ശൃംഖലകൾ ലക്ഷ്യമിട്ട് ആക്രമണം ഉണ്ടായേക്കുമെന്ന സൂചനയെത്തുടർന്ന്, ഇന്ന് രാത്രി 9 മണി വരെ ട്രെയിൻ യാത്രകൾ ഒഴിവാക്കാൻ ഇറാൻ പൗരന്മാർക്ക് ഇസ്രായേൽ സൈന്യം (IDF) മുന്നറിയിപ്പ് നൽകി. ഇസ്രായേൽ സൈന്യത്തിൻ്റെ പേർഷ്യൻ വക്താവ് ലഫ്റ്റനന്റ് കേണൽ കമാൽ പെൻഹാസിയാണ് സോഷ്യൽ മീഡിയ പ്ലാറ്റ്ഫോമായ എക്സിലൂടെ ഈ അടിയന്തര ജാഗ്രതാ നിർദ്ദേശം നൽകിയത്.
പ്രാദേശിക സമയം ഇന്ന് രാത്രി 9 മണി വരെ ട്രെയിനുകളിലോ റെയിൽവേ ലൈനുകൾക്ക് സമീപമോ ഉള്ള സാന്നിധ്യം ജീവന് ഭീഷണിയാണെന്ന് മുന്നറിയിപ്പിൽ പറയുന്നു. ഇറാനിലെ അടിസ്ഥാന സൗകര്യങ്ങൾക്കും ഊർജ്ജ നിലയങ്ങൾക്കും നേരെ ശക്തമായ ആക്രമണം തുടരാൻ ഇസ്രായേൽ പ്രതിരോധ മന്ത്രി ഇസ്രായേൽ കാറ്റ്സ് സൈന്യത്തിന് നിർദ്ദേശം നൽകിയതിന് പിന്നാലെയാണ് ഈ നീക്കം.
ഇറാനിൽ നിലവിൽ ഇന്റർനെറ്റ് സേവനങ്ങൾക്ക് നിയന്ത്രണമുള്ളതിനാൽ, വിദേശത്തുള്ള പേർഷ്യൻ സാറ്റലൈറ്റ് ചാനലുകൾ വഴിയാണ് ഇസ്രായേൽ ഈ സന്ദേശം ജനങ്ങളിലേക്ക് എത്തിക്കാൻ ശ്രമിക്കുന്നത്. ഇറാൻ്റെ സൈനിക-സാമ്പത്തിക കേന്ദ്രങ്ങളെ തളർത്തുക എന്ന ലക്ഷ്യത്തോടെയുള്ള നീക്കങ്ങളുടെ ഭാഗമായാണ് റെയിൽവേ ഗതാഗതത്തിന് നേരെയുള്ള ഈ ഭീഷണി വിലയിരുത്തപ്പെടുന്നത്. മേഖലയിൽ യുദ്ധസമാനമായ സാഹചര്യം നിലനിൽക്കുന്നതിനാൽ അതീവ ജാഗ്രത തുടരുകയാണ്.
Israel warns against train travel in Iran; country fears attack
