കോഴിക്കോട്: കേരളത്തിലെ ഇടതുപക്ഷ സർക്കാരിനെതിരെ ശക്തമായ വിമർശനവുമായി കെപിസിസി മുൻ പ്രസിഡന്റ് കെ സുധാകരൻ രംഗത്തെത്തി. ജനങ്ങളുടെ വികാരവിചാരങ്ങൾ മനസ്സിലാക്കാൻ കഴിയാത്ത ഒരു ഭരണകൂടത്തിന് കേരളം ഭരിക്കാനുള്ള അവകാശമില്ലെന്ന് അദ്ദേഹം പറഞ്ഞു. പാവപ്പെട്ടവരുടെ പ്രശ്നങ്ങൾ പരിഹരിക്കാൻ സാധിക്കാത്ത ഈ സർക്കാരിന് അധികാരത്തിൽ തുടരാനുള്ള അർഹതയില്ലെന്നും അദ്ദേഹം കൂട്ടിച്ചേർത്തു. കോഴിക്കോട് കടപ്പുറത്ത് യുഡിഎഫ് സംഘടിപ്പിച്ച മഹാറാലിയിലാണ് കെ. സുധാകരൻ ഈ വിമർശനങ്ങൾ ഉന്നയിച്ചത്.
നാട്ടിലെ ജനങ്ങൾ വലിയ തോതിലുള്ള വിലക്കയറ്റം സഹിച്ചുകൊണ്ടാണ് ജീവിതം മുന്നോട്ടുകൊണ്ടുപോകുന്നതെന്ന് സുധാകരൻ ചൂണ്ടിക്കാട്ടി. ഈ സ്ഥിതി തുടർന്നാൽ ജനങ്ങൾ സർക്കാരിനെ ഭരണത്തിൽ നിന്ന് ചവിട്ടിപ്പുറത്താക്കുമെന്ന് അദ്ദേഹം താക്കീത് നൽകി. സാധാരണക്കാരന്റെ കൈകൊണ്ട് അടി വാങ്ങേണ്ടിവരുന്ന സ്ഥിതിയിലേക്ക് കാര്യങ്ങൾ എത്തിക്കരുതെന്ന് അദ്ദേഹം മുന്നറിയിപ്പ് നൽകി. പട്ടിണിക്കാരന്റെയും അധ്വാനിക്കുന്നവന്റെയും പ്രശ്നങ്ങൾ പരിഹരിക്കേണ്ടത് അത്യന്താപേക്ഷിതമാണെന്നും, അതിനായി നമ്മുടെ നാടിനെ മാറ്റിപ്പണിയണമെന്നും അദ്ദേഹം ആവശ്യപ്പെട്ടു. രാജ്യത്തിന് മുന്നിൽ കേരളം ശക്തമായ നാടാണെന്ന് തെളിയിക്കുന്ന പ്രവർത്തനങ്ങളുമായി മുന്നോട്ടുപോകാൻ നമുക്ക് സാധിക്കണമെന്നും പ്രസംഗത്തിൽ അദ്ദേഹം വ്യക്തമാക്കി.
