സീറ്റ് നിഷേധിക്കപ്പെട്ടതിനെത്തുടർന്ന് പാർട്ടി വിടുമെന്ന അഭ്യൂഹങ്ങൾക്ക് വിരാമമിട്ട് കെ. സുധാകരൻ രംഗത്തെത്തി. താൻ എക്കാലത്തും കോൺഗ്രസിനൊപ്പം തന്നെ ഉണ്ടാകുമെന്നും പാർട്ടിയെ വെല്ലുവിളിച്ച് ഒരിടത്തേക്കും പോകില്ലെന്നും അദ്ദേഹം വ്യക്തമാക്കി. ഹൈക്കമാൻഡ് തീരുമാനം അംഗീകരിച്ച് നാട്ടിലേക്ക് മടങ്ങാനാണ് അദ്ദേഹത്തിന്റെ തീരുമാനം. തന്നെ പിന്തുണയ്ക്കുന്നവർ എല്ലായിടത്തും ഉണ്ടെന്നും അത് പാർട്ടിയെ ശക്തിപ്പെടുത്താനാണെന്നും അദ്ദേഹം കൂട്ടിച്ചേർത്തു.
സ്ഥാനാർത്ഥി നിർണ്ണയവുമായി ബന്ധപ്പെട്ട അനിശ്ചിതത്വങ്ങൾക്കിടെ എഐസിസി അധ്യക്ഷൻ മല്ലികാർജ്ജുൻ ഖർഗെ സുധാകരനെ നേരിട്ട് വിളിച്ചു സംസാരിച്ചു. പാർട്ടി തീരുമാനത്തോട് സഹകരിക്കണമെന്ന് ഖർഗെ അദ്ദേഹത്തോട് ആവശ്യപ്പെട്ടു. ഇതിന് പുറമെ കെ.സി. വേണുഗോപാലുമായി രണ്ട് തവണ സുധാകരൻ ചർച്ചകൾ നടത്തിയിരുന്നു. ഈ ചർച്ചകൾക്കൊടുവിലാണ് പാർട്ടിക്ക് വിധേയനായി തുടരാൻ അദ്ദേഹം തീരുമാനിച്ചത്.
പാർട്ടി പറഞ്ഞാൽ മാത്രമേ താൻ മത്സരിക്കുകയുള്ളൂവെന്നും അച്ചടക്കമുള്ള പ്രവർത്തകനായി തുടരുമെന്നും സുധാകരൻ വ്യക്തമാക്കി. വിമതനായി മത്സരിക്കാനോ പാർട്ടിയെ പ്രതിസന്ധിയിലാക്കാനോ താനില്ലെന്ന് അദ്ദേഹം മാധ്യമങ്ങളോട് പറഞ്ഞു. ഇതോടെ കണ്ണൂർ മണ്ഡലത്തിലെ സ്ഥാനാർത്ഥി നിർണ്ണയത്തിൽ കോൺഗ്രസ് നേതൃത്വത്തിനുണ്ടായിരുന്ന വലിയൊരു ആശങ്കയ്ക്ക് പരിഹാരമായിരിക്കുകയാണ്. ഉടൻ തന്നെ യുഡിഎഫിന്റെ ഔദ്യോഗിക പട്ടിക പുറത്തുവരും.
K Sudhakaran stays with Congress; says will not challenge party decisions
