തിരുവനന്തപുരം : കേരളത്തിലെ പ്രധാനപ്പെട്ട രണ്ട് മുഖ്യധാരാ സഖ്യങ്ങൾക്കെതിരെ രൂക്ഷമായ ആക്രമണങ്ങൾ അഴിച്ചുവിട്ട് പ്രധാനമന്ത്രി നരേന്ദ്ര മോദി. “കേരളം മുന്നേറണമെങ്കിൽ എൽഡിഎഫ്-യുഡിഎഫ് ജോഡിയെ തകർക്കണം” എന്ന് തിരുവനന്തപുരത്ത് പ്രധാനമന്ത്രി പറഞ്ഞു. ബിജെപിക്കും എൻഡിഎയ്ക്കും മാത്രമേ കേരളത്തിന് ഒരു ജനപക്ഷ സർക്കാരിനെ നൽകാനാകൂ എന്നും അദ്ദേഹം പറഞ്ഞു.
തിരുവനന്തപുരം കോർപ്പറേഷൻ തിരഞ്ഞെടുപ്പിലെ ബിജെപിയുടെ വിജയത്തിന് ശേഷമുള്ള അദ്ദേഹത്തിൻ്റെ ആദ്യ സന്ദർശനമാണിത്. കഴിഞ്ഞ മാസം തിരുവനന്തപുരത്ത് നടന്ന തദ്ദേശ സ്വയംഭരണ സ്ഥാപനങ്ങളിലേക്കുള്ള തിരഞ്ഞെടുപ്പിൽ ബിജെപി നേടിയ വിജയം കേരളത്തിൽ പാർട്ടിക്ക് സ്വീകാര്യത ലഭിക്കുന്നുണ്ടെന്ന് സൂചിപ്പിക്കുന്നുവെന്ന് പ്രധാനമന്ത്രി നരേന്ദ്ര മോദി ഉറപ്പിച്ചു പറഞ്ഞു.
“1987 ന് മുമ്പ്, ഗുജറാത്തിലെ പ്രാന്തപ്രദേശത്തുള്ള ഒരു പാർട്ടിയായിരുന്നു ബിജെപി. 1987 ൽ, ആദ്യമായി ബിജെപി അംദാവാദ് മുനിസിപ്പൽ കോർപ്പറേഷൻ നേടി – ഇന്ന് നിങ്ങൾ തിരുവനന്തപുരത്ത് വിജയിച്ചതുപോലെ. അവിടെ നിന്ന്, ഗുജറാത്തിൽ ആരംഭിച്ച പരമ്പരയാണിത് – ആളുകൾ ഞങ്ങളുടെ പ്രവർത്തനങ്ങൾ കണ്ടു, ഞങ്ങളുടെ പെരുമാറ്റം വിലയിരുത്തി, അതിന്റെ ഫലമായി, കഴിഞ്ഞ നിരവധി പതിറ്റാണ്ടുകളായി അവിടുത്തെ ആളുകൾ ഞങ്ങൾക്ക് അവസരങ്ങൾ നൽകിവരുന്നു. ഇതെല്ലാം ആരംഭിച്ചത് ഒരു നഗരത്തിൽ നിന്നാണ്. കേരളത്തിലും ഇത് ഒരു നഗരത്തിൽ നിന്നാണ് ആരംഭിച്ചത്. ഇപ്പോൾ, കേരളം ഞങ്ങളെ വിശ്വസിക്കുകയും ഞങ്ങളുമായി ബന്ധപ്പെടുകയും ചെയ്തിട്ടുണ്ട്,” അദ്ദേഹം പറഞ്ഞു.
“തിരുവനന്തപുരം തദ്ദേശ സ്വയംഭരണ സ്ഥാപനങ്ങളിലേക്കുള്ള തിരഞ്ഞെടുപ്പിൽ ബിജെപി നേടിയ വിജയം സാധാരണമല്ല. അസാധാരണമാണ്. തിരുവനന്തപുരത്തെ ജനങ്ങൾ ബിജെപിക്ക് അവരെ സേവിക്കാൻ അവസരം നൽകി” നരേന്ദ്ര മോദി ആവേശംകൊണ്ടു. കേരളത്തെ കൊള്ളയടിച്ച തട്ടിപ്പുകാരിൽ നിന്ന് ഓരോ പൈസയും ബിജെപി തിരിച്ചുപിടിക്കുമെന്നും പ്രധാനമന്ത്രി പറഞ്ഞു.
“Kerala trusts BJP, Thiruvananthapuram’s victory is extraordinary, only BJP and NDA can give Kerala a pro-people government” – Modi
