പാലക്കാട്ടെ യുഡിഎഫ് സ്ഥാനാർത്ഥി രമേഷ് പിഷാരടി സ്ത്രീവിരുദ്ധ പരാമർശം നടത്തിയെന്ന് ആരോപിച്ച് മഹിളാ മോർച്ച പോലീസിൽ പരാതി നൽകി. മഹിളാ മോർച്ച പാലക്കാട് ജില്ലാ പ്രസിഡന്റ് കവിതാ മേനോനാണ് ജില്ലാ പോലീസ് മേധാവിക്ക് പരാതി നൽകിയത്. ബലാത്സംഗങ്ങളെ വ്യക്തിപരമായി ചിത്രീകരിക്കുക വഴി ഇരകളെയും സ്ത്രീത്വത്തെയും പിഷാരടി അവഹേളിച്ചുവെന്നാണ് പരാതിയിലെ പ്രധാന ആരോപണം. സംഭവത്തിൽ മാതൃകാപരമായ നടപടി സ്വീകരിക്കണമെന്നും പരാതിയിൽ ആവശ്യപ്പെടുന്നു.
തനിക്കെതിരെയുള്ള പരാതി തോൽവി ഉറപ്പായപ്പോൾ ബിജെപി സ്ഥാനാർത്ഥി നടത്തുന്ന വെറും ‘ഗിമ്മിക്ക്’ മാത്രമാണെന്ന് രമേഷ് പിഷാരടി പ്രതികരിച്ചു. എന്തിനാണ് ബിജെപി ഇപ്പോൾ ഇങ്ങനെയൊരു പരാതിയുമായി വന്നിരിക്കുന്നതെന്ന് എല്ലാവർക്കും അറിയാമെന്നും അദ്ദേഹം പറഞ്ഞു. താൻ എന്ത് സ്ത്രീവിരുദ്ധ പ്രസ്താവനയാണ് നടത്തിയതെന്ന് വ്യക്തമാക്കണമെന്നും രാഷ്ട്രീയ താല്പര്യങ്ങൾ മുൻനിർത്തിയാണ് ഇത്തരം ആരോപണങ്ങൾ ഉന്നയിക്കുന്നതെന്നും അദ്ദേഹം കൂട്ടിച്ചേർത്തു.
വിവാദ രാഷ്ട്രീയം മടുത്തു എന്നാണ് എൻഡിഎയുടെ ബോർഡുകളിൽ എഴുതിവെച്ചിരിക്കുന്നത്, എന്നാൽ അവർ വിവാദങ്ങൾ മാത്രമാണ് ഉണ്ടാക്കുന്നതെന്ന് പിഷാരടി പരിഹസിച്ചു. തനിക്ക് ജനങ്ങളോട് വികസനത്തെക്കുറിച്ചും മറ്റ് നിരവധി കാര്യങ്ങളെക്കുറിച്ചും സംസാരിക്കാനുണ്ട്. എന്നാൽ ബിജെപിക്ക് വിവാദങ്ങളിൽ മാത്രമാണ് താൽപര്യമെന്നും അദ്ദേഹം വ്യക്തമാക്കി. പാലക്കാട് വടക്കന്തറയിൽ വെച്ച് ബിജെപി പ്രവർത്തകർ തന്നെ തടഞ്ഞ സംഭവത്തിന് പിന്നാലെയാണ് പുതിയ പരാതിയുമായി മഹിളാ മോർച്ച രംഗത്തെത്തിയിരിക്കുന്നത്.
Mahila Morcha files complaint against Ramesh Pisharody; Candidate calls it a political gimmick
