ന്യൂഡൽഹി: ലോക മദ്യവിപണിയിലെ വമ്പൻമാരെ അമ്പരപ്പിച്ചുകൊണ്ട് ഒരു മലയാളി സംരംഭം ആഗോള ശ്രദ്ധ നേടുന്നു. ലണ്ടനിൽ നടന്ന പ്രശസ്തമായ ‘ലണ്ടൻ സ്പിരിറ്റ്സ് കോമ്പറ്റീഷനിൽ’ (LSC) മലയാളിയുടെ ഉടമസ്ഥതയിലുള്ള ‘Beau Cape VSOP’ (ബോ കേപ്പ്) എന്ന അർമേനിയൻ ബ്രാണ്ടി സ്വർണ്ണ മെഡൽ കരസ്ഥമാക്കി. ആഗോളതലത്തിൽ 95 പോയിൻ്റുകൾ നേടിയാണ് ഈ അപൂർവ്വ നേട്ടം മലയാളികൾ സ്വന്തമാക്കിയത്.
കോട്ടയം സ്വദേശിയായ ബിനീഷ് പള്ളത്ത് എന്ന പ്രവാസി മലയാളി സംരംഭകൻ്റെ ദീർഘവീക്ഷണമാണ് ഈ വിജയത്തിന് പിന്നിൽ. അദ്ദേഹത്തിൻ്റെ ഉടമസ്ഥതയിലുള്ള പികെജിഎസ് ഗ്രൂപ്പിൻ്റെ കീഴിലാണ് ബോ കേപ്പ് നിർമ്മിക്കപ്പെടുന്നത്. അർമേനിയയിലെ ലോകപ്രശസ്തമായ അരാരത്ത് താഴ്വരയിൽ സ്വന്തമായി ഡിസ്റ്റിലറി സ്ഥാപിച്ചാണ് ഇദ്ദേഹം ഈ ബ്രാൻഡ് പുറത്തിറക്കുന്നത്.
അർമേനിയൻ മദ്യനിർമ്മാണ പാരമ്പര്യത്തെയും മലയാളി സംരംഭകത്വത്തെയും കൂട്ടിയിണക്കിയതാണ് ഈ ബ്രാൻഡിൻ്റെ വിജയം. എന്തുകൊണ്ട് ബോ കേപ്പ് ഒന്നാമതായി? വെറുതെ ഒരു മെഡൽ നേടുകയല്ല ബോ കേപ്പ് ചെയ്തത്, മറിച്ച് കടുത്ത മാനദണ്ഡങ്ങൾ മറികടന്നാണ് ഈ അംഗീകാരം. അരാരത്ത് താഴ്വരയിലെ പ്രത്യേക ഇനം മുന്തിരികളും ശുദ്ധജലവും ഉപയോഗിച്ച് തയ്യാറാക്കുന്ന ഇതിൻ്റെ രുചിയും മണവും വിധികർത്താക്കളെ ആകർഷിച്ചു. ലോകപ്രശസ്ത മാസ്റ്റർ ബ്ലെൻഡർ ഐസി സിൻക്ലെയറുടെ (Aisie Sinclair) മേൽനോട്ടത്തിലാണ് ഇതിൻ്റെ ഓരോ തുള്ളിയും തയ്യാറാകുന്നത്. കാണാൻ മനോഹരമായ ബോട്ടിൽ ഡിസൈനും, ഈ ഗുണനിലവാരത്തിന് അനുയോജ്യമായ വിലയും ഇതിനെ മുൻനിരയിൽ എത്തിച്ചു.
പരമ്പരാഗത യൂറോപ്യൻ മദ്യനിർമ്മാണ കേന്ദ്രങ്ങൾക്ക് അപ്പുറത്തേക്ക് ചിന്തിക്കാനുള്ള ബിനീഷിൻ്റെ തന്ത്രപരമായ തീരുമാനമാണ് ബോ കേപ്പിൻ്റെ വിജയത്തിന് അടിസ്ഥാനമായത്. ആദ്യം യൂറോപ്പിൽ നിക്ഷേപം നടത്തുന്നതിനെക്കുറിച്ച് ആലോചിച്ചിരുന്നെങ്കിലും, ഉന്നതനിലവാരത്തിലുള്ള ഉൽപ്പാദനത്തിന് ആവശ്യമായ ഘടകങ്ങളുടെ സവിശേഷമായ കൂടിച്ചേരൽ തിരിച്ചറിഞ്ഞതോടെ അദ്ദേഹം അർമേനിയയിലേക്ക് ശ്രദ്ധ കേന്ദ്രീകരിക്കുകയായിരുന്നു.
“നമ്മുടെ ഡിസ്റ്റിലറിക്കായി ആദ്യം യൂറോപ്പിൽ നിക്ഷേപം നടത്തുന്നതിനെക്കുറിച്ചാണ് ഞാൻ ചിന്തിച്ചിരുന്നത്. എന്നാൽ അർമേനിയ സമാനതകളില്ലാത്ത ചില ഗുണങ്ങൾ വാഗ്ദാനം ചെയ്തു. അരാരത്ത് മേഖലയിലെ സമ്പന്നമായ വീഞ്ഞ് നിർമ്മാണ പാരമ്പര്യം ലോകനിലവാരമുള്ളതാണ്. കൂടാതെ, ഗ്ലേഷ്യറുകളിൽ നിന്ന് നേരിട്ട് ലഭിക്കുന്ന ജലത്തിൻ്റെ ഗുണനിലവാരം മദ്യനിർമ്മാണത്തിന് ഏറ്റവും അനുയോജ്യമാണ്. ഇതിനോടൊപ്പം മിതമായ തൊഴിൽ ചെലവ് കൂടി ചേരുമ്പോൾ, അന്താരാഷ്ട്ര വിപണിയിൽ മികച്ച വിലയിൽ വിൽക്കാൻ കഴിയുന്ന ഉന്നതനിലവാരമുള്ള (പ്രീമിയം) ബ്രാണ്ടി ഉൽപ്പാദിപ്പിക്കാൻ ഞങ്ങൾക്ക് സാധിക്കുന്നു,” ബിനീഷ് പറയുന്നു.
മണവാട്ടിയും മെഡൽ നേടി!
തനി നാടൻ പേരുമായി അന്താരാഷ്ട്ര വിപണിയിൽ എത്തിയ ‘മണവാട്ടി’യും ഇത്തവണ ലണ്ടനിൽ ശ്രദ്ധാകേന്ദ്രമായി. ഇതേ മത്സരത്തിൽ തന്നെ മലയാളിയായ ജോൺ സേവ്യറിൻ്റെ ഉടമസ്ഥതയിലുള്ള ‘മണവാട്ടി’ എന്ന ബ്രാൻഡും വെങ്കല മെഡൽ നേടി തിളങ്ങി.
മലയാളികൾക്ക് അഭിമാന നിമിഷം ലോകത്തിലെ ഏറ്റവും മികച്ച സ്പിരിറ്റുകൾ തിരഞ്ഞെടുക്കുന്ന വേദിയിൽ, ലോക ഭീമന്മാരായ ഫ്രഞ്ച് ബ്രാണ്ടുകളോടും മറ്റും മത്സരിച്ച് വിജയിക്കുക എന്നത് ചെറിയ കാര്യമല്ല. പ്രവാസി മലയാളികളുടെ നിശ്ചയദാർഢ്യത്തിൻ്റെയും സംരംഭകത്വത്തിൻ്റെയും വിജയം കൂടിയാണിത്.
Malayali’s brandy Beau Cape wins gold at the London Spirits Competition!
