പ്രധാനമന്ത്രി നരേന്ദ്ര മോദിയുടെ സുരക്ഷാ വിവരങ്ങൾ ചോർത്താമെന്നും അദ്ദേഹത്തെ വധിക്കാമെന്നും വാഗ്ദാനം ചെയ്ത് അമേരിക്കൻ ചാരസംഘടനയായ സിഐഎയ്ക്ക് സന്ദേശമയച്ച യുവാവടക്കം 3 പേരെ ബിഹാർ പോലീസ് കസ്റ്റഡിയിലെടുത്തു. ബിഹാറിലെ ബക്സർ ജില്ലയിലെ സിമ്രി പോലീസ് സ്റ്റേഷൻ പരിധിയിലുള്ള അരരിയ ഗ്രാമത്തിൽ നിന്നാണ് അമൻ കുമാർ (അമൻ തിവാരി) എന്ന യുവാവാണ് സംഘത്തിലെ പ്രധാനിയെന്നാണ് വ്യക്തമാകുന്നത്. സിഐഎയുടെ ഔദ്യോഗിക വെബ്സൈറ്റിൽ കയറി സന്ദേശം നൽകിയതിനെത്തുടർന്ന് കേന്ദ്ര ഏജൻസികൾ നൽകിയ വിവരത്തിന്റെ അടിസ്ഥാനത്തിലായിരുന്നു നടപടിയെന്നാണ് റിപ്പോർട്ട്.
22 ദിവസത്തിനുള്ളിൽ ഇന്ത്യൻ പ്രധാനമന്ത്രിയെ വധിക്കാമെന്നും ഇതിന് പ്രതിഫലമായി വൻ തുക വേണമെന്നുമാണ് യുവാവ് സിഐഎയോട് ആവശ്യപ്പെട്ടത്. ഇയാളുടെ വീട്ടിൽ നിന്ന് ലാപ്ടോപ്പുകളും മറ്റ് ഇലക്ട്രോണിക് ഉപകരണങ്ങളും പോലീസ് പിടിച്ചെടുത്തിട്ടുണ്ട്. മുമ്പ് 2022-ൽ കൊൽക്കത്ത വിമാനത്താവളം ഹാക്ക് ചെയ്യുമെന്ന് ഭീഷണിപ്പെടുത്തിയ കേസിൽ കൊൽക്കത്ത, ബക്സർ പോലീസ് സംഘം ഇയാളെ അറസ്റ്റ് ചെയ്തിരുന്നു. പ്രതിക്ക് മറ്റ് തീവ്രവാദ സംഘടനകളുമായി ബന്ധമുണ്ടോ എന്ന് അന്വേഷണ ഏജൻസികൾ പരിശോധിച്ചുവരികയാണ്.
പ്രധാനമന്ത്രിയുടെ സുരക്ഷയുമായി ബന്ധപ്പെട്ട വിഷയമായതിനാൽ അതീവ ഗൗരവത്തോടെയാണ് പോലീസ് കേസിനെ സമീപിക്കുന്നത്. പ്രതിയുടെ ഇലക്ട്രോണിക് ഉപകരണങ്ങൾ ശാസ്ത്രീയ പരിശോധനയ്ക്കായി അയച്ചിട്ടുണ്ട്. കേന്ദ്ര ഏജൻസികളുടെയും സംസ്ഥാന പോലീസിന്റെയും സംയുക്തമായ അന്വേഷണം ഈ കേസിൽ പുരോഗമിക്കുകയാണ്. വിദേശ ചാരസംഘടനയുമായി ബന്ധപ്പെടാൻ ശ്രമിച്ചതിന്റെ പശ്ചാത്തലത്തിൽ ഇയാളെ കൂടുതൽ ചോദ്യം ചെയ്തുവരികയാണ്.
Man held in Bihar for sending threat message to CIA against PM Modi
