പരസ്യപ്രസ്താവനകൾ നടത്തുന്ന കെ സുധാകരനും ജെബി മേത്തർക്കുമെതിരെ നടപടി വേണമെന്ന് രാജ്മോഹൻ ഉണ്ണിത്താൻ എംപി

കാസർകോട്: മുതിർന്ന നേതാവ് കെ. സുധാകരനും മഹിളാ കോൺഗ്രസ് സംസ്ഥാന അധ്യക്ഷ ജെബി മേത്തർക്കുമെതിരെ കെപിസിസി നിർദേശം ലംഘിച്ച് പരസ്യപ്രസ്താവനകൾ നടത്തുന്നതിൽ ശക്തമായ അച്ചടക്ക നടപടി വേണമെന്ന് രാജ്മോഹൻ ഉണ്ണിത്താൻ എംപി. ഇരുവർക്കും പാർട്ടിയിൽ യാതൊരുവിധ പ്രത്യേക പരിഗണനകളോ അവകാശങ്ങളോ ഇല്ലെന്ന് വ്യക്തമാക്കിയ ഉണ്ണിത്താൻ, ഈ അച്ചടക്കലംഘനത്തിൽ നേതൃത്വം എന്ത് നടപടിയെടുക്കുന്നു എന്നതിനെ ആശ്രയിച്ചായിരിക്കും മറ്റ് നേതാക്കൾ വിലക്ക് പാലിക്കുന്നതെന്നും മുന്നറിയിപ്പ് നൽകി.

കെപിസിസി അധ്യക്ഷ സ്ഥാനത്തുനിന്ന് നീക്കിയതിൽ അമർഷം പ്രകടിപ്പിക്കുകയും പാർട്ടി നേതൃത്വത്തെയും സർക്കാരിനെയും വിമർശിക്കുകയും ചെയ്യുന്ന കെ. സുധാകരന്റെ വീഡിയോ പുറത്തുവന്നതിന് പിന്നാലെയാണ് ഉണ്ണിത്താന്റെ പ്രതികരണം.. കെപിസിസി പ്രസിഡന്റ് സണ്ണി ജോസഫ്, പാർട്ടി നേതാക്കൾ തങ്ങളുടെ അഭിപ്രായഭിന്നതകൾ പരസ്യമായി പ്രകടിപ്പിക്കരുതെന്ന് കർശന വിലക്ക് ഏർപ്പെടുത്തിയിട്ടുള്ളതിനാൽ താൻ കൂടുതൽ പ്രതികരണത്തിനില്ലെന്നും കാസർകോട്ട് മാധ്യമങ്ങളോട് സംസാരിക്കവെ ഉണ്ണിത്താൻ പറഞ്ഞു.

കെ. സുധാകരൻ എഴുതി തയ്യാറാക്കി വായിച്ച പ്രസ്താവന താൻ കണ്ടു. അത് ഗുരുതരമായ അച്ചടക്കലംഘനമാണ്. കെപിസിസി അധ്യക്ഷ സ്ഥാനത്തുനിന്ന് സുധാകരനെ മാറ്റിയത് മുൻപാണ്. അതൃപ്തികൾ അറിയിക്കാൻ പല അവസരങ്ങളുണ്ടായിട്ടും ഇപ്പോൾ ഇത്തരത്തിൽ പ്രസ്താവന തയ്യാറാക്കി വായിച്ചത് ശരിയല്ല. പാർട്ടിയുടെ മുതിർന്ന നേതാക്കളെ പരസ്യമായി വിമർശിക്കാൻ ജെബി മേത്തർക്ക് ആരാണ് അധികാരം നൽകിയതെന്ന് അദ്ദേഹം ചോദിച്ചു.

മുൻപും നിരവധി നേതാക്കൾ മഹിളാ കോൺഗ്രസിന്റെ നേതൃത്വം വഹിച്ചിട്ടുണ്ടെങ്കിലും ആരും പാർട്ടിയുടെ ആഭ്യന്തര കാര്യങ്ങളിൽ ഇത്തരത്തിൽ പരസ്യപ്രസ്താവനകൾ നടത്തിയിട്ടില്ല. ജെബി മേത്തർക്ക് ഇതിനായി എന്തെങ്കിലും പ്രത്യേക അധികാരമുണ്ടോ. പാർട്ടി നിർദേശം ലംഘിച്ചവർക്കെതിരെ നേതൃത്വം നടപടിയെടുക്കാൻ തയ്യാറായില്ലെങ്കിൽ തങ്ങളടക്കമുള്ള മറ്റ് നേതാക്കളും പരസ്യമായി പ്രതികരിക്കുമെന്നും അവരെ നിയന്ത്രിക്കാൻ പാർട്ടിക്ക് സാധിക്കുന്നില്ലെങ്കിൽ അനന്തരഫലങ്ങൾ നോക്കാതെ തന്നെ പ്രധാനപ്പെട്ട പല കാര്യങ്ങളും തുറന്നുപറയാൻ തങ്ങൾക്കും അറിയാമെന്നും ഉണ്ണിത്താൻ കൂട്ടിച്ചേർത്തു.

പുറത്ത് വന്ന വീഡിയോയിൽ സുധാകരൻ മതിയായ കാരണമില്ലാതെ തന്നെ മാറ്റിയതിൽ വിഷമമുണ്ടെന്നും ചിലർ ഇടപെട്ടാണ് തന്നെ പുറത്താക്കിയതെന്നും പറഞ്ഞിരുന്നു. സിഎംആർഎൽ വിഷയത്തിൽ മുൻ മുഖ്യമന്ത്രി പിണറായി വിജയനെതിരെ എഫ്ഐആർ രജിസ്റ്റർ ചെയ്യാൻ വൈകിയെന്ന വിമർശനങ്ങളും മുഖ്യമന്ത്രി വി.ഡി. സതീശനെതിരെ യുഡിഎഫ് കൺവീനർ അടൂർ പ്രകാശ് നടത്തിയ പ്രസ്താവനകളും പാർട്ടിക്കുള്ളിൽ ചർച്ചയാകുന്നതിനിടയിലാണ് കെപിസിസി അധ്യക്ഷൻ കൂടിയായ മന്ത്രി സണ്ണി ജോസഫ് നേതാക്കൾക്ക് പരസ്യപ്രസ്താവന വിലക്ക് ഏർപ്പെടുത്തി രംഗത്തെത്തിയത്.

MP Rajmohan Unnithan has demanded action against K. Sudhakaran and Jebi Mather for making public statements.