ന്യൂഡൽഹി: റഷ്യൻ പ്രതിപക്ഷ നേതാവും പ്രസിഡൻ്റ് പുടിൻ്റെ കടുത്ത വിമർശകനുമായിരുന്ന അലക്സി നവൽനിയുടെ (47) മരണം ഒരു കൊലപാതകമാണെന്ന് തെളിയിക്കുന്ന നിർണായക വെളിപ്പെടുത്തലുകൾ ലോകത്തെ ഞെട്ടിച്ചിരിക്കുകയാണ്. തെക്കേ അമേരിക്കയിൽ കാണപ്പെടുന്ന വിഷത്തവളകളുടെ (പോയിസൺ ഡാർട്ട് ഫ്രോഗുകൾ) ചർമ്മത്തിൽ നിന്ന് ഉത്പാദിപ്പിക്കുന്ന അതീവ മാരകമായ എപിബാറ്റിഡിൻ (Epibatidine) എന്ന വിഷം ഉപയോഗിച്ചാണ് അദ്ദേഹത്തെ കൊലപ്പെടുത്തിയതെന്ന് അഞ്ച് യൂറോപ്യൻ രാജ്യങ്ങൾ ഔദ്യോഗികമായി അറിയിച്ചു.
മോർഫിനേക്കാൾ 200 മടങ്ങ് പ്രഹരശേഷിയുള്ളതാണ് ഈ വിഷം. ഇത് ശരീരത്തിലെത്തിയാൽ പേശികളുടെ തളർച്ച, ശ്വാസതടസ്സം, അപസ്മാരം തുടങ്ങിയ ലക്ഷണങ്ങളുണ്ടാകുകയും ഒടുവിൽ ഹൃദയസ്തംഭനത്തിലേക്കും മരണത്തിലേക്കും നയിക്കുകയും ചെയ്യും. യുകെ, ഫ്രാൻസ്, ജർമ്മനി, സ്വീഡൻ, നെതർലൻഡ്സ് എന്നീ രാജ്യങ്ങളിലെ ലാബുകളിൽ നടത്തിയ ശാസ്ത്രീയ പരിശോധനയിലാണ് നവൽനിയുടെ ശരീരത്തിൽ ഈ വിഷത്തിൻ്റെ സാന്നിധ്യം സ്ഥിരീകരിച്ചത്.
റഷ്യയിൽ സ്വാഭാവികമായി കാണപ്പെടാത്ത ഈ വിഷം നവൽനിക്ക് നൽകാൻ റഷ്യൻ ഭരണകൂടത്തിന് മാത്രമേ സാധിക്കൂ എന്ന് ഈ രാജ്യങ്ങൾ ചൂണ്ടിക്കാട്ടുന്നു. ഇത് കെമിക്കൽ വെപ്പൺസ് കൺവെൻഷൻ്റെ ലംഘനമാണെന്നും അവർ ആരോപിച്ചു. അദ്ദേഹത്തിൻ്റെ വിധവയായ യുലിയ നവൽനായ, തന്റെ ഭർത്താവിനെ പുടിൻ കൊലപ്പെടുത്തിയതാണെന്നതിന് ഇപ്പോൾ ശാസ്ത്രീയമായ തെളിവ് ലഭിച്ചിരിക്കുകയാണെന്ന് പ്രതികരിച്ചു.
എന്നാൽ, നവൽനി സ്വാഭാവിക കാരണങ്ങളാലാണ് മരിച്ചതെന്ന വാദത്തിൽ റഷ്യ ഉറച്ചുനിൽക്കുകയാണ്. പുതിയ കണ്ടെത്തലുകളെ “പാശ്ചാത്യ രാജ്യങ്ങളുടെ കുപ്രചരണം” എന്നാണ് റഷ്യൻ പ്രതിനിധികൾ വിശേഷിപ്പിച്ചത്.
2024 ഫെബ്രുവരി 16-നാണ് ആർട്ടിക് ജയിലിൽ വെച്ച് നവൽനി കൊല്ലപ്പെട്ടത്. മരണസമയത്ത് കെട്ടിച്ചമച്ച കുറ്റങ്ങൾ ചുമത്തപ്പെട്ട് മൂന്ന് വർഷമായി അദ്ദേഹം ജയിലിലായിരുന്നു. ജയിലിൽ അല്പദൂരം നടന്ന ശേഷം കുഴഞ്ഞുവീണാണ് മരണം സംഭവിച്ചതെന്നാണ് റഷ്യൻ ഔദ്യോഗിക ഭാഷ്യം.
2020-ൽ ‘നോവിചോക്ക്’ എന്ന മാരകമായ നാഡിവിഷം പ്രയോഗിച്ച് നവൽനിയെ വധിക്കാൻ ശ്രമം നടന്നിരുന്നു. അന്ന് ജർമ്മനിയിൽ ചികിത്സ തേടിയ അദ്ദേഹം തിരികെ റഷ്യയിൽ എത്തിയ ഉടൻ അറസ്റ്റ് ചെയ്യപ്പെടുകയായിരുന്നു.
പോയിസൺ ഡാർട്ട് ഫ്രോഗുകൾ സ്വാഭാവികമായി റഷ്യയിൽ കാണപ്പെടുന്നവയല്ല. മാത്രമല്ല, പരീക്ഷണശാലകളിൽ വളർത്തുന്ന ഈയിനത്തിലെ തവളകളിൽ കടുത്ത വിഷം കണ്ടെത്തിയിട്ടുമില്ല. കാട്ടിലെ സ്വാഭാവിക ആവാസവ്യവസ്ഥയിൽ ജീവിക്കുന്ന പോയിസൺ ഡാർട്ട് ഫ്രോഗുകളിലാണ് വിഷം കണ്ടെത്തിയത്. ഇത്തരം തവളകളുടെ സ്വാഭാവികമായ ഭക്ഷണരീതികളും ആവാസവ്യവസ്ഥയുമാണ് വിഷത്തിനു കാരണമെന്നാണ് ശാസ്ത്രജ്ഞരുടെ നിഗമനം.
Navalny’s life was taken by a rare ‘poison’ in Russia, extracted from frogs and 200 times more potent than morphine.
