എലത്തൂർ നിയമസഭാ മണ്ഡലത്തിൽ എ കെ ശശീന്ദ്രനെ എൽഡിഎഫ് സ്ഥാനാർത്ഥിയായി എൻസിപി ദേശീയ നേതൃത്വം ഔദ്യോഗികമായി പ്രഖ്യാപിച്ചു. സ്ഥാനാർത്ഥി നിർണ്ണയത്തിന് പിന്നാലെ കോഴിക്കോട് റെയിൽവേ സ്റ്റേഷനിലെത്തിയ ശശീന്ദ്രന് പ്രവർത്തകർ വൻ സ്വീകരണം നൽകി. മുക്കം മുഹമ്മദിന്റെ പേര് സംസ്ഥാന നേതൃത്വം ശുപാർശ ചെയ്തിരുന്നുവെങ്കിലും ദേശീയ നേതൃത്വം തന്നെ തിരഞ്ഞെടുക്കുകയായിരുന്നുവെന്ന് അദ്ദേഹം വ്യക്തമാക്കി. മുക്കം മുഹമ്മദ് സ്ഥാനാർത്ഥിത്വത്തിന് അർഹനാണെന്നും പാർട്ടി തീരുമാനം അദ്ദേഹം അംഗീകരിക്കുമെന്നാണ് പ്രതീക്ഷയെന്നും ശശീന്ദ്രൻ കൂട്ടിച്ചേർത്തു.
എന്നാൽ, ശശീന്ദ്രന്റെ സ്ഥാനാർത്ഥിത്വത്തിനെതിരെ എൻസിപി കോഴിക്കോട് ജില്ലാ കമ്മിറ്റിയിൽ കടുത്ത അമർഷമാണ് ഉയരുന്നത്. പാർട്ടിയിലെ ഒരു വിഭാഗം നേതാക്കളും പ്രവർത്തകരും ശശീന്ദ്രൻ വീണ്ടും മത്സരിക്കുന്നതിനോട് പൂർണ്ണമായും വിയോജിക്കുന്നു. ജില്ലാ ഘടകത്തിന്റെ വികാരവും താൽപ്പര്യവും കണക്കിലെടുക്കാതെയാണ് ദേശീയ നേതൃത്വം ഏകപക്ഷീയമായി തീരുമാനമെടുത്തതെന്നാണ് ഇവരുടെ പ്രധാന ആരോപണം. പ്രാദേശിക നേതാക്കളുടെ പിന്തുണയില്ലാതെ ശശീന്ദ്രനെ വിജയിപ്പിക്കുക പ്രയാസമാണെന്ന മുന്നറിയിപ്പും ഇവർ നൽകുന്നുണ്ട്.
മത്സരരംഗത്ത് നിന്ന് പിന്മാറില്ലെന്ന ഉറച്ച നിലപാടിലാണ് മുക്കം മുഹമ്മദ് വിഭാഗം. ജില്ലയിലെ എൻസിപി നേതാക്കളുടെ യോഗം നാളെ ചേരാനിരിക്കെ, സ്വതന്ത്രനായി മത്സരിക്കുന്നതടക്കമുള്ള കാര്യങ്ങൾ പരിഗണനയിലാണെന്നാണ് സൂചന. നേതൃത്വത്തിന്റെ അവഗണനയിൽ പ്രതിഷേധിച്ച് നാളെ നിർണ്ണായക പ്രഖ്യാപനം ഉണ്ടാകുമെന്ന് മുക്കം മുഹമ്മദ് വ്യക്തമാക്കി. ഇതോടെ എലത്തൂർ സീറ്റിൽ എൽഡിഎഫിനുള്ളിൽ വലിയൊരു രാഷ്ട്രീയ പോരാട്ടത്തിന് കളമൊരുങ്ങിയിരിക്കുകയാണ്.
NCP Internal Feud Escalates in Elathur; AK Saseendran Faces Opposition as Mukkam Mohammed Plans to Contest
