ഒമാനിലെ വിനോദസഞ്ചാര കേന്ദ്രത്തിലുണ്ടായ പ്രളയത്തിൽ മലയാളി യുവാവിന് ദാരുണാന്ത്യം, മരിച്ച മലയാളികളുടെ എണ്ണം മൂന്നായി

മസ്കറ്റ്/കൊല്ലം: ഒമാനിലെ പ്രശസ്ത വിനോദസഞ്ചാര കേന്ദ്രമായ വാദി ബനീ ഖാലിദിലുണ്ടായ മിന്നൽ പ്രളയത്തിൽ ഒരു മലയാളി കൂടി മരിച്ചു. കൊല്ലം പെരിനാട് കണ്ടച്ചിറ സ്വദേശി മഹേഷ് കുമാർ ആണ് മരിച്ചത്. ഇതോടെ ഒമാനിലുണ്ടായ ശക്തമായ മഴയിലും പ്രളയത്തിലും മരിച്ച മലയാളികളുടെ എണ്ണം മൂന്നായി ഉയർന്നു.

കഴിഞ്ഞ ദിവസം ഉണ്ടായ ശക്തമായ മഴയെത്തുടർന്ന് വാദിയിലെ വെള്ളച്ചാട്ടത്തിൽ ജലനിരപ്പ് പെട്ടെന്ന് ഉയരുകയായിരുന്നു. മിന്നൽ പ്രളയത്തിൽ അകപ്പെട്ടാണ് മഹേഷിന് ജീവൻ നഷ്ടമായത്. കഴിഞ്ഞ ദിവസങ്ങളിൽ ഉണ്ടായ സമാനമായ അപകടങ്ങളിൽ രണ്ട് മലയാളികൾ കൂടി മരിക്കുകയും ഒരാളെ കാണാതാവുകയും ചെയ്തിരുന്നു.
നിലവിൽ മഹേഷിൻ്റെ മൃതദേഹം ഇബ്ര ആശുപത്രി മോർച്ചറിയിൽ സൂക്ഷിച്ചിരിക്കുകയാണ്.

മൃതദേഹം നാട്ടിലെത്തിക്കാനുള്ള നടപടികൾ പുരോഗമിക്കുന്നു. വരും ദിവസങ്ങളിലും ഒമാൻ്റെ വിവിധ ഭാഗങ്ങളിൽ മഴ തുടരാൻ സാധ്യതയുള്ളതിനാൽ വിനോദസഞ്ചാരികൾക്കും പ്രവാസികൾക്കും അധികൃതർ ജാഗ്രതാ നിർദ്ദേശം നൽകിയിട്ടുണ്ട്.

Oman floods: One more Malayali dies; death toll rises to three